Biz ýakynlaşmagy ugur edinýäris

Magtymguly adyndaky Türkmen döwlet uniwersitetinde beýik türki filology Mahmyt Kaşgarlynyň «Diwany lugat at-türk» sözlüginiň döredilmeginiň 950 ýyllygyna bagyşlanyp utgaşykly görnüşdäki halkara ylmy maslahaty geçirildi.

Çäräni Türkmenistanyň Ylymlar akademiýasy, ÝUNESKO-nyň işleri boýunça Milli topary hem-de Türki medeniýeti we mirasy gaznasy bilelikde gurady. Foruma öňdebaryjy alymlar, bilermenler we ylmy işgärler gatnaşyp, sözlükde beýan edilen ynsanperwer gymmatlyklaryny we parahatçylyk döredijilik pikirlerini, şeýle hem olaryň häzirki halkara gatnaşyklardaky ähmiýetini ara alyp maslahatlaşdylar.

Mahmyt Kaşgarlynyň XI asyrda düzen «Diwany lugat at-türk» atly eseri türki dialektologiýasynyň özboluşly ýadygärligidir. Bu sözlük Merkezi Aziýa halklarynyň dili, medeniýeti we däp-dessurlary barada ensiklopedik maglumatlary özünde jemleýär. Sözlükde takmynan 7 500 söz, ýüzlerçe nakyllar we pähimler, şeýle hem oguz-türkmenleriň we beýleki taýpalaryň senetçiligi we gündelik durmuşyna degişli maglumatlar bar. 2017-nji ýylda bu eser ÝUNESKO-nyň «Dünýä hakydasy» halkara sanawyna girizildi.

Maslahatda Kaşgarlynyň mirasynyň Türkmenistanyň taryhyny öwrenmekdäki ähmiýetine aýratyn üns berildi. Türkmen halkynyň Milli Lideri Gurbanguly Berdimuhamedow «Türkmenistan – Beýik Ýüpek ýolunyň ýüregi», «Hakydanyň göwheri» we «Ömrümiň manysynyň dowamaty» atly eserlerinde Mahmyt Kaşgarlynyň hyzmatlaryny ylmy çuňňurlyk bilen we minnetdarlyk bilen ýatlap, onuň paýhasly pikirlerini beýan edýär we alymyň ýurdumyzyň gadymy taryhyny öwrenmekdäki ornuny açyp görkezýär. Şeýlelikde, bu beýik gündogar alymynyň abraýy has-da belende göterilýär.

Maslahatda türkmen halkynyň şahyry we akyldary Magtymguly Pyragynyň saýlanan eserlerinden ybarat iki dilli «Aşyk bolmuşam» atly kitabynyň tanyşdyrylyş dabarasy geçirildi. Bu neşir Türki medeniýeti we mirasy gaznasy tarapyndan şahyryň 300 ýyllygyna bagyşlanyp, türkmen we azerbaýjan dillerinde taýýarlanyldy. Kitap Türkmenistanyň we Azerbaýjanyň arasyndaky medeni hyzmatdaşlygyň nyşany hökmünde çykyş edýär.

Eseriň tanyşdyrylyş dabarasy ylmy jemgyýetiň hem-de diplomatik korpusyň wekillerini birleşdirip, umumy edebi mirasy gorap saklamagyň we türki dilli halklaryň arasynda medeni gatnaşygy ösdürmegiň möhüm ähmiýetini nygtady.

ORIENT

Foto: turkmenmetbugat.gov.tm