Biz ýakynlaşmagy ugur edinýäris

Google öz ykjam operasion ulgamynda duýduryşlary dolandyrmak ulgamyna düýpli üýtgeşme girizmäge taýýarlanýar. Android 16 bilen birlikde ulanyjylar täze "Duýduryş tertipleýjisi" (Notification Organizer) mümkinçiligini alarlar. Bu ulgam emeli aňyň kömegi bilen gelen duýduryşlary awtomatiki ýagdaýda ýöriteleşdirilen kategoriýalara bölüp tertipleşdirmek üçin niýetlenendir: mahabat teklipleri, täzelikler, sosial hyzmatdaşlyklar we şahsy maslahatlar.

Android 16-nyň birinji çärýek täzelenmesiniň çäginde işe girizilmegi meýilleşdirilen bu mümkinçilik artykmaç maglumat seslerini ep-esli azaltmaga gönükdirilendir. Ulgamyň işleýişiniň esasy Gmail’däki elektron hatlary tertiplemek ulgamyna meňzeýär: az ähmiýetli hasaplanýan duýduryşlar awtomatiki ýagdaýda toparlara bölünýär, iň möhüm maglumatlara bolsa aýratyn üns berilýär. Bu çemeleşme ulanyjylara haýsy habarlaryň gyssagly üns talap edýändigini kesgitlemekde has giň gözegçiligi berýär.

Ilkibaşda "Duýduryş tertipleýjisi" diňe Pixel enjamlarynda elýeterli bolar diýlip garaşylýar. Ulanyjylara käbir programmalarda awtomatiki tertiplemegi aýratynlykda öçürmek mümkinçiligi hem berler, bu bolsa möhüm duýduryşlaryň derrew ekranda peýda bolmagyny üpjün eder. Şonuň bilen birlikde, bu funksiýanyň esasy kody Android 16-nyň açyk çeşmeli taslamasynyň bir bölegi bolsa-da, emeli aň moduly open-source komponenti bolmadyk Android System Intelligence atly programma arkaly işlenilýär. "Duýduryş tertipleýjisiniň" ähli Android 16 ulgamy bilen işleýän enjamlar üçin elýeterli bolmagy tapgyrlaýyn amala aşyrylar.

Google emeli aň ulgamynyň käwagt duýduryşlary nädogry kategoriýa ýerleşdirip biljekdigini boýun alýar. Şonuň üçin kompaniýa ulanyjylara doly gözegçiligi we aýratyn programmalary awtomatiki tertiplemeden çykarmak mümkinçiligini berýär. Umuman aýdanyňda, "Duýduryş tertipleýjisiniň" ornaşdyrylmagy Android ulgamynyň hakykatdan hem akylly we şahsylaşdyrylan duýduryş dolandyryş ulgamyna öwrülmegine tarap möhüm ädimdir.

ORIENT

Foto: rutab.net