Biz ýakynlaşmagy ugur edinýäris

28-nji ýanwarda Fransiýadaky Türkmenistanyň Adatdan daşary we Doly ygtyýarly ilçisi Maksat Çaryýewiň Peace and Sport Halkara guramasynyň Prezidenti, Monako Şazadasy Alber II geňeşçisi Žoel Buzu bilen duşuşygy geçirildi. Duşuşyk 2025-nji ýylyň 19-20-nji ýanwarynda türkmen halkynyň Milli Lideri Gahryman Arkadagymyzyň Monako Knýazlygyna amala aşyran saparynyň dowamynda ýetilen möhüm ylalaşyklarynyň dowamy boldy.

Taraplar hyzmatdaşlygyň mümkin bolan ugurlaryny, şol sanda 2025-nji ýylda Peace and Sport guramasynyň çärelerine Türkmenistanyň gatnaşmagyny, şeýle hem Türkmenistanda Peace and Sport halkara forumynyň geçirilmegini ara alyp maslahatlaşdylar. Parahatçylygyň we ynanyşmagyň ýörelgelerine laýyk gelýän hem-de halkara bileleşigi we Monako Knýazlygy tarapyndan uly hormat bildirilýän Türkmenistanyň Bitaraplyk derejesine aýratyn üns berildi.

Taraplar sport arkaly parahatçylygy öňe sürmekde, halkara özara düşünişmegi pugtalandyrmakda hem-de bilelikdäki başlangyçlary durmuşa geçirmekde hyzmatdaşlygy ösdürmäge taýýardyklaryny beýan etdiler. Türkmenistan halkara işlerine işjeň gatnaşyjysy hökmünde, parahatçylygy, ynanyşmagy we sazlaşykly ösüşi pugtalandyrmakda öz goşandyny goşmaga dowam eder.

ORIENT News

Foto: Fransiýadaky Türkmenistanyň Ilçihanasy tarapyndan berildi