Biz ýakynlaşmagy ugur edinýäris

9-njy ýanwarda türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Mejlisiň Başlygynyň hem-de Ministrler Kabinetiniň agzalarynyň gatnaşmagynda Türkmenistanyň Bitaraplygynyň 30 ýyllygy hem-de 2025-nji ýylyň BMG-niň Baş Assambleýasy tarapyndan “Halkara parahatçylyk we ynanyşmak ýyly” diýlip yglan edilmegi mynasybetli çäreleri geçirmek boýunça Guramaçylyk döwlet toparynyň mejlisini geçirdi.

Halkara parahatçylyk we ynanyşmak ýyly hem-de hemişelik Bitaraplygymyzyň şanly 30 ýyllygy mynasybetli ýubileý medalynyň we ýadygärlik nyşanyň taslamasyny taýýarlamak, öňde boljak çäreleri geçirmek bilen bagly zerur maliýe işleriniň bökdençsiz amala aşyrylmagyny, haryt bolçulygyny üpjün etmek we azyk önümleriniň gaplarynyň bezegine-de ýylyň şygary we nyşany bilen bezemeklik tabşyryldy.

Türkmenistanyň Halk Maslahatyň Başlygy, baýramçylyk çärelerinde paýtagtyň ýaşaýjylarynyň we myhmanlarynyň rahat dynç almagy üçin ähli şertleri döretmegi, şäheriň abadanlaşdyrylmagyny we baýramçylyk bezegini üpjün etmegi tabşyrdy. Şeýle hem sowgatlyk we ýadygärlik harytlaryň giň toplumyny döretmegiň möhümdigini aýtdy. Gurbanguly Berdimuhamedow öňdäki geçiriljek dabaralaryň çäginde aýratyn sowgatlyk önümlerini öndürmegi we dokma önümleriniň sergilerini ýokary derejede guramagy tabşyrdy.

Medeniýet edaralary ýubileý çärelerine işjeň gatnaşmagynyň, häzirki medeni meselelere bagyşlanan forumlaryň geçirilmeginiň, ýurtda bolup geçýän halkara wakalaryň köpçülikleýin habar beriş serişdelerinde giňişleýin beýan edilmeginiň we ýokary okuw mekdeplerinde ýurduň bitaraplygyň şanly senesine we şu ýylyň şygaryna bagyşlanyp okuw sapaklaryny halkara ylmy we amaly maslahatlaryň gurralmagynyň ähmiýeti nygtaldy.

Türkmen halkynyň Milli Lideri wise-premýer, daşary işler ministri Raşid Meredowa halkara çäreleriň maksatnamasyny işläp taýýarlamak üçin ähli zerur işleri ýerine ýetirmegi hem-de olara gatnaşmagy göz öňünde tutulýan daşary ýurt wekiliýetleriniň sanawyny anyklamak bilen bagly degişli işleri geçirmegi tabşyrdy. Guramaçylyk komitetiniň agzalaryna, meýilleşdirilýän çäreleriň durmuşa geçirilmegi bilen baglanyşykly ähli meseleler, Guramaçylyk döwlet komitetiniň başlygynyň orunbasary R.Meredow bilen utgaşdyrmak tabşyryldy.

Mundan başga-da, gelýän myhmanlar üçin ýörite howa gatnawlary guramak we resmi wekiliýetlere ulag-kommunikasiýa hyzmatlary bilen üpjin etmek barada görkezmeler berildi.

“Halkara parahatçylyk we ynanyşmak ýyly hem-de hemişelik Bitaraplygymyzyň 30 ýyllygy mynasybetli geçiriljek çäreleriň üsti bilen merdana halkymyzyň asylly däp-dessurlaryny, myhmansöýerligini, eziz Diýarymyzyň hemmetaraplaýyn gülläp ösýändigini we ynamly öňe barýandygyny bütin dünýä aýdyň görkezmelidiris” diýip, Türkmenistanyň Halk Maslahatynyň Başlygy belledi. Diýarymyzda Birleşen Milletler Guramasy bilen bilelikde geçiriljek halkara çäreleriň dünýäde parahatçylygy we ynanyşmagy berkitmek, Durnukly ösüş maksatlaryny ýerine ýetirmäge goşant goşmak babatda möhüm waka boljakdygyna berk ynam bildirdi.

Gurbanguly Berdimuhamedow geçiriljek halkara çäreler bilen baglylykda, mejlise gatnaşyjylara BMG-niň degişli düzüm birlikleri bilen ýakyndan hyzmatdaşlyk etmegi tabşyrdy. Şunuň bilen baglylykda, bu hyzmatdaşlygy mundan beýläk-de ösdürmek maksady bilen, ýakyn günlerde Guramaçylyk döwlet toparynyň agzalary saparda bolarlar diýip, TDH döwlet habarlar agentligi habar berýär.

Guramaçylyk döwlet toparynyň agzalaryna Halkara parahatçylyk we ynanyşmak ýylynda Türkmenistanyň bitaraplyk baýramyny ýokary derejede geçirmek boýunça konsepsiýany taýýarlamagy tabşyryldy.

ORIENT

Foto: orient.tm