Biz ýakynlaşmagy ugur edinýäris

2024-nji ýylyñ oktýabr-dekabr aýlarynda Türkmenistanyñ Prezidentiniñ ýanyndaky Döwlet gullugy akademiýasynyñ diñleýjileri Türkmenistanyñ Prezidentiniñ ýanyndaky Döwlet gullugy akademiýasynyñ we Türkiýe Respublikasynyñ Prezidentiniñ Adam serişdeleri edarasynyñ arasyndaky hyzmatdaşlygy ösdürmek boýunça özara düşünişmek barada Ähtnamany durmuşa geçirmegiñ çäklerinde adam serişdesini dolandyrmak boýunça onlaýn okuwlaryny geçdiler.

Onlaýn seminarlar Türkiýe Respublikasynyñ Prezidentiniñ Adam serişdeleri edarasynyñ bilermenleri tarapyndan geçirildi.

Özara düşünişmek baradaky Ähtnama hyzmatdaşlygy kämilleşdirmek hem-de döwlet gullukçylarynyñ hünär ösüşi bilen baglanyşykly möhüm çäreleriñ geçirilmegini, şol sanda adam serişdesini dolandyrmak boýunça hyzmatdaşlygyñ giñeldilmegini, bilelikdäki okuw maksatnamalaryñ işläp taýýarlanylmagyny, uzak aralykdan okuwlaryñ geçirilmegini, şeýle hem mugallymlar we talyplar üçin okuw sapaklarynyñ guralmagyny öz içine alýar.

Onlaýn sapaklaryñ dowamynda "Adam serişdesiniñ strategiki meýilnamalaşdyrylmagy", "Dolandyrmakda zerur bolan ygtyýarlyklar", "Mümkinçilikleri dolandyrmak", "Maglumatlary seljermegiñ we dolandyrmagyñ esasy usullary", "Okatmagyñ sanly tejribeleri" ýaly mowzuklar boýunça maslahatlaşmalar geçirildi. Seýle hem, onlaýn seminarlar adam serişdesini strategiki dolandyrmagyñ wajyplygyna hem-de zämet kuwwatlylygyñ doly ulanylmagynyñ netijesinde kompaniýanyñ işgärlerini dolandyrmakda täsirine, bütin dünýäde dolandyryjylaryñ esasy ukyplaryna, işgärleri dolandyrmakda sanly tehnologiýalaryñ ulanylmagyna bagyşlandy.

Munuñ ýaly seminarlaryñ geçirilmegi adam serişdeleri babatda özara bähbitli hyzmatdaşlygyñ hem-de döwlet gullugynda sanly ulgamyñ ösdürilmeginde möhüm ähmiýete eýedir.

ORIENT news

Foto: Türkmenistanyñ Prezidentiniñ ýanyndaky Döwlet gullugy akademiýasy tarapyndan berildi