Meşhur bloger Afrikada 100 sany suw guýusyny gurdy

07.11.2023 | 17:10 |

Dünýäniň iň meşhur blogerleriniň biri "MrBeast" lakamy bilen tanalýan Jimmi Donaldson Afrika yklymynyň dürli ýurtlarynda 100 sany suw guýusyny gurduryp açdy. Bu ýagşylyk yklymda ýarym milliondan gowrak ilatyň suw bilen üpjün edilmegine ýardam etdi.

"MrBeast" özüniň "YouTube" kanalynda bu duýgulary beýan edýän 10 minutlyk wideoşekilini ýaýratdy. Ol sosial ulgamyny ulanyjylaryň derrew ünsüni özüne çekdi. "Siz diňe Keniýadaky bir obada köpsanly adamyň suw bilen üpjün edilişine tomaşa etdiňiz. Bu diňe bir suw guýusynyň beýany, ýene-de 99 guýy galdy" diýip, bloger öz wideoşekiliniň başynda beýan etdi.

Bloger özüniň wideoşekilinde adamlaryň içimlik suwa nähili garaşýandygyny görkezdi. Mälim edilişine görä, şeýle guýular Keniýada, Zimbabwede, Ugandada, Somalide we Kamerunda guruldy. Bloger her bir guýuda mähirli garşylanýar.

"Maňa adamlaryň derrew suw almaga gelşi ýaraýar. Şundan täsirli duýgyny heniz başymdan geçirip görmedim" diýip, waka şaýat bolanlaryň biri özüniň täsirlerini paýlaşýar.

Nygtalyşyna görä, blogeriň eden ýagşylygy köp adamlar üçin nusga alarlykdyr. Munuň üçin bloger birnäçe baýraklar berilmäge mynasyp. Mundan daşary "MrBeast" birnäçe mekdebi kompýuterler, proýektorlar we okuw tagtasy bilen üpjün etdi. Ol bir obaň çagalaryna hatda tigir hem sowgat etdi.

"Forbes" neşiri "MrBeasty" 2023-nji ýylda iň gowy wideoşekilli ýazgyny döreden adam hökmünde dünýä sanawynda birinji orunda goýdy. Onuň "YouTube" kanalynda 312 million agza bar. Geçen ýyl ol 1 müň adamyň göz kesellerini bejermäge hem hemaýat etdi.

ORIENT news