Türkmenistanda seýsmiki töwekgelçiliklere baha bermek üçin çäklerde barlag geçirmegiň täze usuluny oýlap tapdylar

08.08.2023 | 10:58 |

Ýaponiýada saparda bolan ýurdumyzyň wekiliýetiniň düzümindäki Türkmenistanyň Ylymlar akademiýasynyň Seýsmologiýa we atmosferanyň fizikasy institutynyň alymlary seýsmiki töwekgelçilikleri peseltmek ulgamynda ýapon kärdeşleriniň tejribesini öwrendiler. Sapar BMG-niň Ösüş maksatnamasy bilen bilelikdäki taslamanyň çäklerinde guraldy. Bu taslama iň täze tehnologiýalaryň kömegi bilen Aşgabatda seýsmiki howpa toplumlaýyn baha bermegi göz öňünde tutýar.

Bu barada «Нейтральный Туркменистан» gazeti üçin makalasynda institutyň alym sekretary Swetlana Ahmedowa habar berýär.

Bellenilişi ýaly, häzirki wagtda Aşgabat şäherini seýsmiki taýdan mikroetraplaşdyrmak kartasy işlenilip taýýarlanyldy. Bu karta paýtagtymyzyň ähli gurluşykçylary üçin kadalaşdyryjy resmina bolar. Bu kartany döretmek üçin alymlar deslapky burawlaýyş işlerini geçirmeden çäkleri toplumlaýyn barlamaga mümkinçilik berýän innowasion usuly oýlap tapdylar. Bu tejribe eýýäm Arkadag şäheriniň çäginde ulanylmaga başlandy.

Mundan başgada degişli hukuk binýady ýapon tarapy bilen bilelikde seýsmiki gözegçilik ulgamlaryny kämilleşdirmäge we munuň üçin maglumat toruny döretmäge, şeýle hem Aşgabat şäheriniň çäginde we onuň daş töwereginde inženerçilik-geologiýa barlag işlerini geçirmäge mümkinçilik berýär. Taslamanyň durmuşa geçirilmegi netijesinde seýsmiki gözegçiligi üznüksiz amala aşyrmaga mümkinçilik berýän sanly ulgam ornaşdyrylar.

Türkmenistanyň Ylymlar akademiýasynyň bu institutynyň alyp barýan halkara hyzmatdaşlygy «Sil sowujy desgalar toplumynda» Russiýanyň Ylymlar akademiýasynyň O.Ý.Şmidt adyndaky Ýeriň fizikasy instituty bilen bilelikde ylmy-barlag işlerine girişmäge mümkinçilik berdi. Şeýle hem Türkmenistanyň Ylymlar akademiýasynyň Seýsmologiýa we atmosferanyň fizikasy instituty bilen Täjigistanyň Geologiýa, sýsmiki durnukly gurluşyk we seýsmologiýa institutynyň arasyndaky Ähtnama ylalaşmak tapgyrynda, Özbegistanyň G.A.Mawlänow adyndaky seýsmologiýa instituty bilen Ähtnama bolsa taýýarlyk tapgyryndadyr.

ORIENT news