BelTA: TIBO-23 halkara forumy 18-21-nji aprelde Minskide geçiriler

07.02.2023 | 17:00 |

Maglumat-aragatnaşyk tehnologiýalary boýunça XXIX TIBO-23 Halkara forumy 18-21-nji aprelde Minskide geçiriler – diýip, Aragatnaşyk we maglumatlaşdyryş ministrligine salgylanyp, BelTA habar berýär.

Ýurduň premýer-ministri Roman Golowçenko tarapyndan gol çekilen buýruga laýyklykda çäräniň guramaçylyk komitetiniň düzümi tassyklanyldy. Onuň düzümine ministrlikleriň, edaralaryň, birleşmeleriň we beýleki guramalaryň wekilleri girdiler, onuň başlygy edilip bolsa Aragatnaşyk we maglumatlaşdyryş ministri Konstantin Şulgan bellenildi.

Guramaçylyk komitetine TIBO-23-iň konsepsiýasyny işläp düzmek we tassyklamak, ekspozisiýany ýokary derejede guramak boýunça utgaşykly işleri üpjün etmek tabşyryldy, şeýle hem forumyň işewürlik çäreleriniň maksatnamasyny taýýarlamak we geçirmek tabşyryldy.

TIBO forumy — maglumatlar tehnologiýalary babatynda öňdebaryjy tejribäni paýlaşmak üçin, sanly transformasiýalaryň iň gowy dünýä tejribelerini seljermegiň we ykdysadyýetiň däp bolup gelýän pudaklarynda täze tehnologiýalaryň netijeli ulanylmagynyň geljegini ara alyp maslahatlaşmagyň ajaýyp meýdançasydyr. Bäş günüň dowamynda döwlet guramalary we hususy kompaniýalar öz işläp düzmelerini we tehnologiýalaryny hödürlärler.

Çäre 1994-nji ýyldan bäri Aragatnaşyk we maglumatlaşdyryş ministrliginiň başlangyjy bilen geçirilýär.

ORIENT habarlar