Biz ýakynlaşmagy ugur edinýäris

Türkmenistanyň Ilçisi Ýazmyrat Seräýew BMG tarapyndan Türkmenistanyň hemişelik bitaraplyk derejesiniň ykrar edilmeginiň 30 ýyllygyna bagyşlanan makalasyny halkara derejesinde tanalýan «Diplomat Magazine» žurnalynda çap etdi. Makalada ýurdumyzyň sebitleýin durnuklylygy we halkara howpsuzlygyny üpjün etmedäki ornuna aýratyn üns berilýär.

«Diplomat Magazine»: Diplomatiýanyň dünýä derejesindäki platformasy

«Diplomat Magazine» – Gaagada ýerleşýän, Ýewropanyň öňdebaryjy diplomatik neşirleriniň biridir. Žurnal dünýäniň dürli künjeklerinden ilçileri, döwlet işgärlerini we hünärmenleri birleşdirýän möhüm pikir alyşma meýdançasy bolup durýar. Ol halkara syýasaty, diplomatiýa, ykdysadyýet we medeniýet boýunça möhüm meseleleri beýan edýär hem-de okyjylara çuňňur seljerme we aýratyn mazmun hödürleýär.

Neşir diplomatiki jemgyýeti birleşdirmekde we ýurtlaryň arasyndaky düşünişmäge ýardam bermekde öz ornuny pugtalandyrdy, şonuň üçin hem ol Türkmenistanyň özbaşdak daşary syýasy taglymatyny dünýä tanatmak üçin iň amatly meýdança bolup durýar.

Türkmenistanyň Bitaraplygy: parahatçylygyň we ynanyşmagyň 30 ýyly

Ilçi makalasynda BMG-niň Baş Assambleýasynyň 1995-nji ýylyň 12-nji dekabrynda kabul eden Kararnamasy bilen resmi taýdan ykrar edilen Türkmenistanyň hemişelik bitaraplygynyň taryhy ähmiýetini açyp görkezýär. Şondan bäri bitaraplyk Türkmenistanyň daşary syýasatynyň möhüm diregi bolup, durnuklylygyň, hoşniýetli goňşuçylyk gatnaşyklarynyň we sebit hyzmatdaşlygynyň berkidilmegine hyzmat edip gelýär.

Awtoryň bellemegine görä, Türkmenistan diplomatik çemeleşmäni talap edýän syýasy duşuşyklary we maslahatlary geçirmek üçin öz bitarap giňişligini işjeň ulanýar. Munuň mysaly hökmünde Aşgabatda geçirilen täjigara we owganara gepleşikler görkezilýär.

Makalada bellenilip geçilişi ýaly, BMG Türkmenistanyň bitaraplyk derejesini üç gezek tassyklady (1995, 2015 we 2025-nji ýyllarda), şeýle hem 12-nji dekabry Halkara Bitaraplyk güni hökmünde yglan etdi. Bu bolsa Türkmenistanyň parahatçylyk söýüjilikli syýasatynyň giň halkara goldawyna eýedigini görkezýär. Bu syýasat “Dialog — parahatçylygyň kepili” şygaryna esaslanýar.

Ilçi Türkmenistanyň halkara başlangyçlaryna, şol sanda «2025-nji ýyl — Halkara parahatçylyk we ynanyşmak ýyly» hakyndaky Kararnamasyna gatnaşýandygyny we şu ýylyň 12-nji dekabrynda Aşgabatda geçiriljek halkara forumyň bu möhüm senelere bagyşlanjakdygyny belleýär.

ORIENT

Foto: mfa.gov.tm