Biz ýakynlaşmagy ugur edinýäris

28-nji awgustda Moskwada Türkmenistanyň Ministrler Kabinetiniň Başlygynyň orunbasary, daşary işler ministri Raşid Meredow bilen Russiýa Federasiýasynyň Daşary işler ministri Sergeý Lawrowyň arasynda gepleşikler geçirildi.

RF-iň DIM-i duşuşykdaky Sergeý Lawronyň çykyşyny çap etdi. Hususan-da, Russiýanyň DIM-niň ýolbaşçysy şeýle diýdi: “Biziň gatnaşyklarymyz ýokary depginde ösdürilýär. Syýasy dialog ýokary we iň ýokary derejede yzygiderli alnyp barylýar, bu bolsa bize ikitaraplaýyn hyzmatdaşlygy giňeltmek we çuňňur strategiki hyzmatdaşlygymyzyň meseleleri boýunça ynanyşmak we aç-açan baha bermäge, halkara syýasaty, Merkezi Aziýa, goňşy sebitler, halkara guramalaryň, ilkinji nobatda BMG-niň işi bilen bagly meseleler boýunça pikir alyşmaga mümkinçilik berýär”.

Hökümetara toparynyň işi we Hökümet derejesinde saparlary alyşmak bellendi. Wise-premýer Nökerguly Atagulyýewiň 25-nji iýulda Altaýda geçirilen Halkara ekologiýa maslahatyna we Russiýa Federasiýasynyň Hökümetiniň Başlygynyň orunbasary Dmitriý Patruşewiň ýolbaşçylygyndaky wekiliýetiniň Awazada geçirlen BMG-niň Deňze çykalgasy bolmadyk ösüp barýan döwletler boýunça üçünji maslahatyna gatnaşandyklary bellenildi.

“Aşgabatda siziň bilen geçiren gepleşiklerimiz ikitaraplaýyn gatnaşyklara uly itergi berdi. Daşary işler ministrlikleriniň arasynda 2025-2026-njy ýyllar üçin Hyzmatdaşlyk maksatnamasyna eýýäm durmuşa geçirilip başlandy. 20-nji awgustda şertnama-hukuk esaslaryny gözden geçirmek üçin duşuşyk geçirildi. Bu berk halkara hukuk binýady esasynda gatnaşyklarymyzy dogry gurmak üçin tehniki, ýöne möhüm işdir” – diýip, Sergeý Lawrow sözüniň üstüni ýetirdi.

Duşuşykda medeni-ynsanperwer gatnaşyklar hem ünsden düşürilmedi. Ýakynda P.I.Çaýkowskiý adyndaky Moskwa döwlet konserwatoriýasynda Beýik Watançylyk urşunda gazanylan Ýeňşiň 80 ýyllygyna, Halkara parahatçylyk we ynanyşmak ýylyna hem-de Türkmenistanyň hemişelik Bitaraplygynyň 30 ýyllygyna bagyşlanan dabaraly türkmen-rus konserti üstünlikli geçirildi.

Gepleşikleriň ahyrynda metbugat maslahaty geçirildi. “RIA Nowostiniň” habar bermegine görä, onuň dowamynda Russiýa bilen Türkmenistanyň söwda-ykdysady hyzmatdaşlygy giňeltmek, infrastruktura we logistika, medeni-ynsanperwer ugurlary boýunça bilelikdäki taslamalary durmuşa geçirmek islegleri mälim edildi.

ORIENT

Foto: mid.ru