Ýokary synp mekdep okuwçylarynyň arasynda Biologiýa dersi boýunça bäsleşik yglan edildi Orient

Ýokary synp mekdep okuwçylarynyň arasynda Biologiýa dersi boýunça bäsleşik yglan edildi

29.08.2025 | 15:05 |

“Halkara parahatçylyk we ynanyşmak” ýylynda ýurdumyzyň umumybilim berýän orta mekdepleriniň ýokary synp okuwçylarynyň arasynda Biologiýa dersi boýunça bäsleşik yglan edildi.

Bäsleşik ýurdumyzyň umumybilim berýän orta mekdepleriniň 11-nji we 12-nji synp okuwçylarynyň arasynda geçirilip we ýumuşlar synplar boýunça tapawutlandyrylmaz (11-nji we 12-nji synplar bilelikde bäsleşerler).

Bäsleşigiň ýumuşlary test görnüşinde bolup, testler türkmen, iňlis we rus dillerinde hödürlener. Berlen testleri işlemek üçin jemi berilýän wagt – 90 minut.

Bäsleşik 2 tapgyrdan, ýagny saýlawjy we jemleýji tapgyrlaryndan ybarat bolup, saýlawjy tapgyryny Welaýat we Aşgabat şäher Baş bilim müdirlikleri, Arkadag şäheriniň bilim müdirligi hem-de Ýöriteleşdirilen umumybilim berýän mekdep-internaty öz jogapkärçiliklerinde mekdep okuwçylarynyň arasynda bäsleşik esasynda ýeňijileri seçip alarlar. Saýlawjy tapgyryň yzygiderliligi: her mekdep okuwçylarynyň arasyndan 3 okuwçyny bäsleşik esasynda saýlap, olary etrap tapgyryna gatnaşdyrmaly hem-de her etrapdan bäsleşik esasynda saýlanan 3 okuwçyny welaýat (şäher) tapgyryna hödürlemeli. Welaýat (şäher) tapgyry 2025-nji ýylyň sentýabr aýynyň 13-ne geçiriler hem-de welaýatlardan we Aşgabat, Arkadag şäherlerinden saýlawjy tapgyryndan saýlanan 5 okuwçy, Ýöriteleşdirilen umumybilim berýän mekdep-internatyndan 3 okuwçy jemleýji tapgyra gatnaşmaga hukuk gazanar.

Bäsleşigiň jemleýji tapgyry 2025-nji ýylyň sentýabr aýynyň 17-ne sagat 10:00-da saýlawjy tapgyrynda ýeňiji bolan okuwçylaryň arasynda Myrat Garryýew adyndaky Türkmenistanyň Döwlet lukmançylyk uniwersitetinde geçiriler.

Gatnaşyjylaryň ählisi häzirki zaman kompýuterleri bilen üpjün ediler hem-de test soraglary we ýumuşlar kompýuterde ýörite programmanyň kömegi bilen geçiriler. Guramaçylyk topary tarapyndan gatnaşyjylara ulanyjynyň ady (login) we parol bäsleşik başlamazdan öň özlerine paýlanar.

Gatnaşyjy ýany bilen diňe ýazuw kagyzyny, ruçka, galam we kalkulýator alyp biler.

Ýumuşlary ýerine ýetirmek üçin berlen wagtyň dowamynda gatnaşyjylara okuw kitaplaryndan, gollanmalaryndan, aragatnaşyk serişdelerinden, öýjükli telefonyndan, gözükdirijilerden, maglumat göteriji-geçiriji beýleki islendik serişdelerinden peýdalanmaga rugsat berilmeýär.

Gatnaşyjylar we olary taýýarlan mugallymlar baradaky maglumatlary 2025-nji ýylyň 15-nji sentýabryna çenli bellenen nusga laýyklykda taýýarlap tdlu.iolimp@gmail.com salgysyna ugratmaly.