Trabzon we Rize türkmen žurnalistlerini garşy alýarlar: Türkiýäniň demirgazyk sebitleri boýunça metbugat-syýahaty
15.05.2025 | 21:45 |
Türkmenistanyñ köpçülikleýin habar beriş serişdeleriniñ wekilleri Gara deňziň gözel kenarynda ýerleşýän Trabzon we Rize şäherlerine guralan metbugat-syýahatyna gatnaşýarlar. Saparyň dowamynda gatnaşyjylar Türkiýäniň demirgazyk sebitleriniň medeni we syýahatçylyk mümkinçilikleri bilen tanyşýarlar.
Metbugat-syýahaty Aşgabat halkara howa menzilindäki hasaba alnyşyk bilen başlandy. Trabzona barýan ýol Stambul arkaly geçdi: ilki bilen Bosfor boýundaky şähere uçar gatnawy amala aşyryldy, soňra bolsa Trabzona gysga we amatly uçuş bilen ýol dowam etdirildi. Stambul howa menzilindäki garaşmak takmynan iki sagat dowam etdi, bu bolsa uzak wagt garaşmalary aradan aýyrdy.
Gatnaşyjylar Turkish Airlines awiakompaniýasynyň ucuş amatlylygyny aýratyn bellediler. Ýolagçylaryň ýüklerini ahyrky nokada - Trabzona çenli tabşyrmak mümkinçiligi Stambuldaky geçelgede goşmaça aladalardan halas etdi. Uçarda elýeterli bolan Wi-Fi hyzmaty syýahaty has-da amatly etdi: ýolagçylar messenjerler arkaly ýakynlary bilen aragatnaşyk saklap bildiler. Internet hyzmatyndan peýdalanmak üçin oturgyç belgi we at görkezilmeli, mugt hyzmatdan peýdalanmak üçin bolsa Miles&Smiles programmasyna agza bolmaly — bu öňünden ýa-da uçuş wagtynda amala aşyrylyp bilner.
Trabzona baranlarynda wekiliýet Mercure Hotel Trabzon atly bäş ýyldyzly, rahat myhmanhanada ýerleşdi. Şol ýerden bu sebitiň taryhy we medeni ýerleri bilen tanyşlygyň gyzykly bölegi başlandy. Gatnaşyjylary gözel daglyk tebigaty we meşhur çaý plantasiýalary bilen tanalýan Rize şäherindäki gezelençler hem garaşýar.
Trabzonda we Rizede nähili ýerleri görmeli, nämeleri dadyp görmeli we nähili duýgylary başdan geçirmeli — bu baradaky maglumatlary indiki habarlarymyzda okap bilersiňiz.
Metbugat-syýahaty Türkiýe Respublikasynyň Türkmenistandaky Ilçihanasy hem-de Türkiýe Respublikasynyň Medeniýet we syýahatçylyk ministrligi (Kültür ve Turizm Bakanlığı) tarapyndan guraldy.
