Türkmenistanda daşary ýurt dillerini öwrenýän ýaşlaryň bilim derejeleri barlandy
20.03.2025 | 18:45 |
19-20-nji martda daşary ýurt dillerini öwrenýän ýaşlaryň bilim derejelerini barlamak, olaryň daşary ýurt dillerini öwrenmeginiň hilini ýokarlandyrmak maksady bilen TBM-niň yglan eden Eýeçiligiň görnüşine garamazdan ähli görnüşdäki gysga möhletli okuwlary guraýan bilim edaralarynda okaýanlaryň arasynda daşary ýurt dilleri boýunça Döwlet bäsleşiginiň III jemleýji tapgyry paýtagtymyzda üstünlikli geçirildi.
Döwlet bäsleşigi iňlis hem rus dilleri boýunça 4 ýaş derejesi boýunça guraldy. Bäsleşigiň jemleýji tapgyrynda gysga möhletli okuwlary guraýan okuw merkezleriniň I we II tapgyrlaryndan üstünlikli geçen 203 sany diňleýjiler zehinlerini synadylar.
Döwlet bäsleşiginiň bu tapgyry Döwletmämmet Azady adyndaky TMDDI-de geçirilip oňa deslapky tapgyrlardaky netijeler boýunça Aşgabat şäheri we Ahal welaýaty boýunça - 35, Balkan welaýaty boýunça - 31, Daşoguz welaýaty boýunça - 47, Lebap welaýaty boýunça - 42, Mary welaýaty boýunça - 48 sany, jemi ýurt boýunça - 203 diňleýji gatnaşmaga hukuk gazandy.
Döwlet bäsleşiginiň III tapgyry açyklyk we aýdyňlyk esasynda geçirilip, Merkezi guramaçylyk toparynyň utgaşdyrmagynda döredilen Guramaçylyk toparynyň, Eminler toparlarynyň hem-de Gözegçi toparlarynyň öz öňlerinde goýlan wezipelerini üstünlikli amala aşyrmaklarynda geçirildi.
Yzygiderli üçünji gezek geçirilýän bu bäsleşigiň ýurdumyzyň ähli künjeklerinden daşary ýurt dillerini öwrenýän ýaş zehinleri, daşary ýurt dilleri boýunça mugallymlary hem-de ýurdumyzyň eýeçiligiň dürli görnüşindäki okuw merkezleriniň wekillerini bir ýere jemlemegi bilim ulgamynda “Halkara parahatçylyk we ynanyşmak ýylynyň” ýatdan çykmajak wakalarynyň birine öwrüldi.
Jemleýji tapgyryň ýeňijilerine Türkmenistanyň Bilim ministrliginiň degişli derejeli diplomlary hem-de höweslendiriji gymmat bahaly baýraklar gowşuryldy. Bäsleşigi ýokary derejede geçirmäge işjeň gatnaşan Guramaçylyk toparynyň, Eminler toparlarynyň hem-de Gözegçi toparlarynyň agzalary-da TBM-niň minnetdarlyk hatlary bilen sylaglandylar.
ORIENT
Foto: education.gov.tm
Şeýle hem okaň:
