Biz ýakynlaşmagy ugur edinýäris

Türkmenistanyñ daşary işler ministriniñ orunbasary Mähri Bäşimowanyñ ýolbaşçylygyndaky türkmen wekiliýeti Atom energiýasy boýunça Halkara agentliginiñ Baş Konferensiýasynyñ 68-nji sessiýasyna gatnaşyp, 18-nji sentýabrda, çarşenbe güni IAEA-nyñ Baş direktory Rafael Grossi bilen duşuşdy.

Duşuşygyñ dowamynda lukmançylyk, oba hojalyk, daşky gurşawy goramak we suw serişdelerini dolandyrmak ýaly ugurlarda atom energiýasynyñ parahatçylykly ulanylyşyna aýraryn üns berildi diýip, türkmen DIM-niñ habarlarynda aýdylýar.

Möhüm ugurlaryñ arasynda onkologiýa kesellerine garşy göreş kesgitlenildi. Munuñ bilen baglylykda, bilelikdäki hereketlere gözegçilik etmek üçin Türkmenistanda durmuşa geçirilýän IAEA-nyñ ImPACT maksatnamasy barada bellenildi. IAEA-nyñ Türkmenistan bilen hyzmatdaşlygynyñ Çarçuwaly Maksatnamasynyñ işlenilip taýýarlanylmagy barada pikirler alşyldy.

Wena amala aşyrylan saparyñ dowamynda Mähri Bäşimowanyñ Ýadro synaglaryny ählumumy gadagan etmek barada Şertnamasy guramasynyň (CTBTO) Ýerine ýetiriji sekretary Robert Floýd bilen duşuşygy geçirildi.

Taraplar hyzmatdaşlyk mümkinçiliklerini, şol sanda ýaşlaryñ arasynda CTBTO barada habarlylygy ýokarlandyrmak, hünärmenleri taýýarlamak, CTBTO tarapyndan gurnalýan seminarlara we okuwlara milli bilermenleriñ gatnaşmagy hem-de tehniki goldaw bermek meselelerini ara alyp maslahatlaşdylar.

Şu hepde, 16-20-nji sentýabr aralygynda Awstriýanyñ Wena halkara merkezinde IAEA-nyñ Baş Konferensiýasynyñ 68-nji sessiýasy geçirilip, onda ýokary wezipeli resmi adamlar we IAEA-nyñ agza-döwletleriniñ wekilleri birnäçe möhüm soraglary ara alyp maslahatlaşýarlar.

Türkmenistanyñ daşary işler ministriniñ orunbasary Mähri Bäşimowa sessiýanyñ umumy mejlisinde çykyş edip, Türkmenistanyñ IAEA bilen işjeñ hyzmatdaşlygynyñ netijesinde dürli ugurlar boýunça dürli derejedäki geñeşmeleri geçirmek tejribesiniñ ýola goýulandygy barada belledi. Türkmenistan tarapyndan edilýän tagallalaryñ ählisi ýurdumyzyñ ileri tutulýan ugurlar boýunça Agentlik bilen hyzmatdaşlygy berkitmek isleginiñ şaýady bolup durýar. Şeýle-de kadalaşdyrylyş-utgaşdyrylyş işiniñ kämilleşdirilmegi we kuwwatynyñ ýokarlandyrylmagy ýaly esasy wezipeleriñ amala aşyrylmagyna garaşylýar.

ORIENT news

Foto: mfa.gov.tm