Biz ýakynlaşmagy ugur edinýäris

Duşenbe güni Türkmenistanyň daşary işler ministriniň orunbasary Ahmet Gurbanow Bütindünýä söwda guramasyna goşulyşmak boýunça departamentiň müdiri Maýk Oşikawanyň ýolbaşçylygyndaky BSG-niň wekiliýeti bilen duşuşdy. Duşuşygyň dowamynda taraplar zerur bolan çäreleriniň esasy tapgyrlaryny we meýilnamalaryny ara alyp maslahatlaşmak bilen, Türkmenistanyň BSG-niň agzalygyna girmeginiň taýýarlyk işlerini utgaşdyrdylar.

Duşuşygyň esasy ugurlary:

Duşuşykda Türkmenistanyň BSG-niň agzalygyna girmeginiň taýýarlyk işleriniň çäklerinde hyzmatdaşlygy ösdürmegiň esasy meseleleri ara alnyp maslahatlaşyldy. Hususan-da, taraplar taýýarlyk çärelerini, şol sanda daşarky söwda tertibi boýunça Ähtnamanyň işläp taýýarlamalaryny durmuşa geçirmek babatda häzirki işlerini ara alyp maslahatlaşdylar. Bu resminama geljekki gepleşikler we hyzmatdaşlyk üçin düýpli esas bolar.

Gurama girmek üçin taýýarlyk işler:

Türkmenistan Guramanyň standartlaryna laýyk gelýän gerekli hukuk we ykdysady gurallarynyň döredilmegini we olaryň ornaşdyrylmagyny öz içine alýan içerki taýýarlyk çäreleriniň üstünde işleýär. Bu babatda ýurduň BSG-niň agzalygyna girmeginiň meseleleriniň öwrenilmegi bilen meşgullanýan Pudagara hökümet komissiýasynyň işi ähmiýetli orun eýeleýär.

Agzalygyň mümkinçilikleri we artykmaçlyklary:

BSG-niň agzasy bolmak Türkmenistan üçin ählumumy bazarlaryna çykmak mümkinçiligini berip, daşary ykdysady iş üçin täze ýollary açyp berer. Bu Guramanyň agzasy bolmak bilen maýa goýum ýagdaýynyň gowulandyrylmagyna ýardam edip, halkara maýa goýumlarynyň çekilmegine we ykdysady ösüşe mümkinçilik berer. Şeýle-de ol söwda gatnaşyklarynyň açyklygyny üpjün eder, hukuk kepillikleri berkidip, söwda dawalaryny halkara derejesinde çözmegiň gurallaryny üpjün eder.

2020-nji ýylyň iýul aýynda Türkmenistana BSG-niň gözegçi derejesi berildi, 2022-nji ýylyň fewralynda bolsa – Gurama goşuljak ýurduň derejesi (işjeň gözegçi) berildi.

ORIENT news

Foto: wto.org