Germaniýanyň Kansleri ilkinji gezek Merkezi Aziýa gelýär – 17-nji sentýabrda C5+1 Sammiti geçiriler

16.09.2024 | 02:40 |

Germaniýanyň Kansleri Olaf Şols resmi sapar bilen Özbegistana geldi. Respublikanyň Prezidenti Şawkat Mirziýoýew myhmany Samarkandyň Registan meýdançasynda garşy aldy. Bu barada özbek Lideriniň habarlar gullugynda aýdylýar.
Samarkand şäheriniň Maslahatlar merkezinde Özbegistan Respublikasynyň Prezidenti Şawkat Mirziýoýew we Germaniýanyň Kansleri Olaf Şolsyň arasynda wekiliýetleriň gatnaşmagynda gysgaldylan formatda gepleşikler geçirildi. Gepleşikleriň netijeleri boýunça 8 sany ikitaraplaýyn resminamalara gol çekildi, hususan-da, Migrasiýa we hereketlilik boýunça köptaraplaýyn hyzmatdaşlyk barada Ylalaşyk; Weterinariýa we maldarçylyk pudaklary boýunça hyzmatdaşlyk barada Jarnama; “Ýaşyl Merkezi Aziýa” başlangyjynyň çäginde suw serişdeleriniň durnukly ulanylmagy boýunça hyzmatdaşlyk barada Jarnama; Kritiki minerallar boýunça hyzmatdaşlyk barada Ylalaşyk; Ulag pudagy boýunça hyzmatdaşlyk barada Ylalaşyk; Pariž ylalaşygynyň çäginde howanyň üýtgemegi boýunça hyzmatdaşlyk barada Ähtnama gol çekildi.

Mundan başga-da, 2024-2026-njy ýyllar üçin Tehnologiýa we senagat hyzmatdaşlygy boýunça Maksatnama kabul edildi hem-de Özbegistanyň we Germaniýanyň öňdebaryjy kärhanalarynyň derejesinde ylalaşyklaryň we şertnamalaryň birnäçesi baglaşyldy.

Özbegistan Germaniýanyň kansleri Olaf Şolsyň saparynyň ilkinji baran nokady boldy. Ol ýerden kansler “C5+1” formatynda Merkezi Aziýa ýurtlarynyň sammitine gatnaşmak üçin Gazagystana ugrar. Kansler bilen bilelikde ýokary wezipeli uly işewürlik wekiliýeti hem sapar bilen gatnaşýar diýip, Germaniýanyň Federatiw Respublikasynyň hökümet saýtynda habar berilýär.

“Federal kansler 17-nji sentýbarda Gazagystanda geçiriljek Z5+1 sammitine hem gatnaşar. Geçen ýyl Berlinde Z5+1 duşuşygynda sebitleýin strategik hyzmatdaşlygy bagşlaşyldy”.

Geçen ýylyň sentýabr aýynyň ahyrlarynda Merkezi Aziýanyň bäş ýurdunyň liderleri Berline sapar bilen bardylar. Şol wagt Germaniýanyň kansleri Olaf Şols myhmanlaryň bu saparynyň ähmiýetli waka bolandygy barada aýdyp, şol formatda täze duşuşyklaryň geçirilmegi barada ylalaşandygyny belläpdi.

ORIENT news