Hazarýaka ýurtlarynyň ýaş liderleri sebitiň täze brendini öňe sürmek üçin ýygnanarlar

27.08.2024 | 01:00 |

2-6-njy sentýabr aralygynda Astrahanda geçiriljek “БерегА” okuw maslahatynyň çäklerinde Hazarýaka ýurtlarynyň ýaş liderleriniň duşuşyk tapgyry geçiriler. Astrahan oblastynyň Ýaşlar baradaky agentliginiň habarlar gullugynda habar berilişi ýaly, duşuşyk tapgyryna gatnaşyjylar sebitiň syýahatçylyk we maýa goýum mümkinçiliklerini ara alyp maslahatlaşarlar. Hazarýaka sebitiniň ýagdaýynyň täze konsepsiýasy işlenilip taýýarlanylar.

“Duşuşyk tapgyrynda Russiýanyň regionlaryndan bolan maslahata gatnaşyjylara Hazarýaka ýurtlarynda 18-35 ýaş aralygyndaky telekeçiler, syýahatçylyk pudagynyň hünärmenleri, brend-menejment, sanly brending hünärmenleri, marketologlar goşulşar” – diýlip, habarda bellenilip, Eýranyň, Türkmenistanyň, Azerbaýjanyň, Gazagystanyň wekilleri eýýäm öz gatnaşmaklaryny tassyklandyklary barada aýdylýar. Şeýle-de duşuşyk tapgyryna Özbegistanyň we Belarusyň wekiliýetleri gatnaşar.

Habarlar gullugynda bellenilişi ýaly, duşuşyk tapgyrynyň meseleleriniň arasynda – “Hazarýaka sebitiniň keşbini nädip üýtgetmeli? Mümkinçilikler we gelejek”, “Sebitiň özboluşly stilini we brendini nädip saýlap almaly?”, şeýle-de sebitleriň medeni mirasyna bagyşlanan leksiýalar geçiriler.

Duşuşyk tapgyryna gatnaşyjylaryň öňünde ýaşlaryň sebit bilen tanyş bolmaklaryny, onuň syýahatçylyk we maýa goýum mümkinçiliklerini ýokarlandyrmak boýunça teklipleri işläp düzmek wezipesi dur. Olar ýaşlaryň telekeçiligi, marketing, syýahatçylyk, çägiň brendleşdirilmegi ugurlarynda Hazarýaka sebitiniň iň naýbaşy tejribelerini ara alyp maslahatlaşarlar. Duşuşyk tapgyryna gatnaşyjylar tarapyndan işlenilip düzülen teklipler “БерегА” Maslahatynyň çäginde sentýabr aýynyň 5-ne öz işine başlajak Halkara dostluk klubynyň işiniň esasyny düzer.

ORIENT news