Koreýanyň tehnologiýa ägirdi «Samsung» Parižde «Galaxy Unpacked» atly iri çäre geçirdi.
Bu çäräniň çäklerinde akylly ýüzükden başlap, çeýe displeýli «Galaxy Z Fold6» we «Galaxy Z Flip6» smartfonlaryna hem-de gulaklyklara çenli birnäçe täze önümler yglan edildi.
Mundan başga-da, Günorta Koreýanyň öndürijisi «Galaxy Z Flip6» smartfonynyň eksklýuziw «Olympic Edition» görnüşini yglan etdi. Şu tomus Fransiýada geçiriljek Olimpiýa we Paralimpiýa oýunlaryna gatnaşyjylaryň hemmesi ony alarlar. «Samsung» 2016-njy ýyldan bäri Olimpiýa oýunlaryna gatnaşyjylara ekslkýuziw smartfonlary sowgat edýär, ýöne bu ýyl türgenler enjamlary resmi taýdan bazara çykmazdan ozal alarlar.
Türgenleriň «Galaxy Z Flip6 Olympic Edition» smartfonyny alan badyna ulanyp bilmekleri üçin her bir smartfon «Orange» operatory tarapyndan 5G torunda 100 GB maglumaty mugt ulanmak mümkinçiligi bolan eSIM bilen üpjün edilendir.
Geçen ýylky nusgalar bilen deňeşdirilende, täze «Galaxy Z Fold» we «Galaxy Z Flip» eplenýän smartfonlarynyň dizaýny kän bir üýtgemedi. Esasy zat enjamyň eplenmegine/açylmagyna jogap berýän täze birleşdiriji şarnirdir. Ol urgulara has çydamly boldy hem-de wagtyň geçmegi bilen smartfonlarda dykylma we çeýe ekrandaky epinleriň has göze ilginç bolmagyna sebäp bolýan daşky bölejikleriň aralaşmagyna agrşy gorag aldy. Indi açylanda ýüze çykýan epinler iki enjamda-da görünmeýär diýen ýaly.
«Galaxy Unpacked 2024-de» täze «Galaxy Watch7» we «Galaxy Watch Ultra» sagatlary, «Galaxy Buds3 Pro» we «Samsung Galaxy Buds3» simsiz TWS gulaklyklary görkezildi.
Ýüzükden başga ähli enjamlar 24-nji iýulda satuwa çykarylar.
Çärede «Samsung» kompaniýasynyň hususy emeli aň ulgamy bolan we «Galaxy AI» ulgamyna aýratyn üns berildi. Bu ulgam şu ýylyň başynda peýda boldy. Kompaniýa onuň öz önümleriniň hemmesiniň satuwyna itergi beriji güýje öwrüljekdigine ynanýar.
«Galaxy AI» ulgamynyň bar bolan ozalky «Gözlemek we tapmak», «Bellikler üçin kömekçi», «Web-kömekçi», «Ses ýazgylary üçin kömekçi» we «Sinhron terjimeçi» mümkinçiliklerinden başga-da, täze aýratynlyklar goşuldy. Bu «Çat-kömekçi» mümkinçiligidir, ol diňe bir tekst stilini habarlarda uýgunlaşdyrmak bilen çäklenmän, emeli aň arkaly bir hata jogap ýa-da berlen mowzukda täze tekst döretmäge mümkinçilik berýär. «AI surat» guraly eskizden ýa-da çyzgydan taýýar şekil döredip bilýär. «Smart Select» bolsa şekili, mysal üçin, suraty emeli aňyň kömegi esasynda döredilen obýekt bilen doldurar.
ORIENT news
