Türkmenistanyň diplomatik wekilhanasy Duşenbede geçirilen halkara medeni festiwala gatnaşdy
25.12.2023 | 17:31 |
23-nji dekabrynda Duşenbe şäherinde “Gündogar-Günbatar: GDA-nyň medeni giňişliginde aýdym-saz däpleri we ýewraziýa halk sungaty” atly Halkara festiwaly geçirildi. Sergi meýdanynda Türkmenistanyň Täjigistan Respublikasyndaky Ilçihanasy tarapyndan sergi burçy guraldy.
Sergä gatnaşyjylar türkmen halkynyň medeni gymmatlyklary, milli halylar we keşdeler, şeýle hem Türkmenistanyň Halk Maslahatynyň başlygy Gurbanguly Berdimuhamedowyň eserleri we Türkmenistanyň garaşsyzlyk ýyllarynda häzirkizaman gazananlaryny görkezýän maglumatlar bilen tanyşdylar. Bu barada Türkmenistanyň Daşary işler ministrligi habar berýär.
Täjigistan Respublikasynyň Medeniýet ministrligi tarapyndan gurnalan bu çärä ýurtda akkreditirlenen diplomatik wekilhanalaryň ýolbaşçylary, habar beriş serişdeleriniň, ylmy intelligensiýanyň we jemgyýetçilik guramalarynyň wekilleri, şeýle hem Täjigistanyň we daşary ýurtlardan döredijilik toparlary gatnaşdy.
Halkara festiwalyň netijeleri boýunça Türkmenistanyň diplomatik wekilhanasy Täjigistan Respublikasynyň Medeniýet ministrliginiň diplomy bilen sylaglandy.
Festiwalyň öňüsyrasynda Aşgabatda Türkmenistanyň Ministrler Kabinetiniň Başlygynyň orunbasary Mährijemal Mämmedowa bilen Täjigistanyň Türkmenistandaky ilçisi Niýatbekzoda Wafonyň arasynda duşuşyk geçirildi.
Söhbetdeşlikde taraplar medeniýet, sungat, syýahatçylyk we metbugat pudagynda ikitaraplaýyn hyzmatdaşlygy ösdürmegiň häzirki ýagdaýy hem-de geljegi barada pikir alyşdylar.
Taraplar iki ýurduň arasynda medeni-ynsanperwer hyzmatdaşlygy giňeltmegiň möhümdigini bellediler we dostlugyň hem-de iki ýurduň medeniýetleriniň özara baýlaşdyrylmagy üçin özara gatnaşyklary işjeňleşdirmäge taýýardyklaryny mälim etdiler.
ORIENT news
