Stambul şäheri “Which?” žurnaly tarapyndan gysga syýahatlar üçin Ýewropanyň iň gowy bäş şäheriniň birine girizildi, şeýle hem “Condé Nast Traveller” neşiriniň okyjylarynyň arasynda geçirilen soraglarynyň netijelerine görä maşgala dynç alyşy üçin iň amatly ugurlaryň biri hökmünde tanaldy.

2025-nji ýylyň ilkinji dokuz aýynda şäher 13,5 milliondan gowrak syýahatçyny kabul etdi, bu bolsa onuň syýahatçylaryň arasynda durnukly meşhurlylygyny tassyklaýar.

ÝUNESKO-nyň Bütindünýä mirasynyň sanawyna girýän Stambulyň taryhy ýarym adasy şäheriň esasy ýerleriniň biridir. Iň köp barylýan ýerleriň hatarynda Aýa-Sofiýa, Gök metjit, Topkapy köşgi we ýerasty Bazilika bar — olar şäheriň özboluşly taryhy keşbini döredýärler. Ýakynlykda ýerleşýän Ýapyk bazar we Hoşboý otlar bazary bolsa gündogaryň dürli reňkli, hoşboý ysly we däp-dessurlary bilen baý gurşawyny saklaýar.

Bosfor boýunda gezelençler hem iň meşhur dynç alyş görnüşleriniň biri bolmagynda galýar. Şäheriň suwdan panoramalary gadymy köşklere, minaralara we diňlere bolan görnüşi açýar, häzirki zaman medeni merkezleri bolsa Galataport, Karaköý we Istiklal köçesinde jemlenendir — bu ýerde muzeýler, galereýalar we kafeler ýerleşýär.

Güýzde Stambulda birnäçe iri medeni çäreler geçirilýär. Olaryň arasynda Stambul Kinomuzeýinde geçirilýän Jeýms Kemeronyň sergisi, Stiw MakKarri tarapyndan guralan “The Haunted Eye” fotosergisi hem-de 29-njy Stambul teatr festiwaly bar.

Şäher öz ajaýyp nahar medeniýeti bilen hem tanalýar. Syýahatçylar adaty ertirlik naharlary, köçe tagamlaryny — kokoreç, kumpir, midýe dolma — we meýhanalarda berilýän agşam naharlary, ýagny mezeleri, balyklary we leňňeçleri aýratyn nygtaýarlar.

Stambul baý taryhy mirasyny we gyzgalaňly häzirki zaman medeni durmuşy bilen birleşdirip, Ýewropanyň iň meşhur syýahat ugurlarynyň biri hökmünde öz ornuny has-da pugtalandyrýar.

ORIENT