GDA-nyň Hemişelik doly ygtyýarly wekilleriniň Geňeşine Türkmenistanyň Halkara parahatçylyk we ynanyşmak ýylynyň Konsepsiýasy hödürlendi

23.01.2025 | 13:45 |

2025-nji ýylyň 22-nji ýanwarynda Minskde Täjigistanyň ýolbaşçylygynda Garaşsyz Döwletleriň Arkalaşygyna (GDA) gatnaşyjy-döwletleriň Hemişelik doly ygtyýarly wekilleriniň Geňeşiniň şu ýylky birinji mejlisi geçirildi. Mejlise GDA-nyň Baş sekretary Sergeý Lebedew hem-de Täjigistanyň Daşary işler ministrliginiň GDA ýurtlary boýunça müdirliginiň başlygy Ahmad Saidmurodzoda gatnaşdy. A.Saidmurodzoda 2025-nji ýyl üçin Täjigistanyň GDA-da başlyklyk etmekliginiň Konsepsiýasyny hem-de ony durmuşa geçirmegiň Iş meýilnamasyny hödürledi. GDA-nyň strategiki resminamalarynda kesgitlenen esasy wezipelere we maksatlara ýetmekde ýardam bermek, şeýle hem Guramanyň işini kämilleşdirmek boýunça meseleleri ara alyp malahatlaşmak başlyklyk etmekligiň esasy maksady boldy.

Täjigistanyň başlyklyk etmekligi Russiýa Federasiýasy we Türkmenistan bilelikdäki başlyklar bilen ýakyn utgaşdyrylmagynda alnyp barylar.

Çäräniň dowamynda ozal Türkmenistanyň ilçihanasy tarapyndan mejlisiň gün tertibine girizilen goşmaça meselelerine laýyklykda, Türkmenistanyň Belarus Respublikasyndaky Adatdan daşary we Doly ygtyaýrly ilçisi, GDA-nyň tertipnamalaýyn we beýleki edaralarynyň ýanyndaky Türkmenistanyň Hemişelik ygtyýarly wekili Nazarguly Şagulyýew tanyşdyrylyş nutuk bilen çykyş etdi.

Şagulyýew mejlise gatnaşyjylara “2025-nji ýyl – Halkara parahatçylyk we ynanyşmak ýyly” atly BMG-niň Baş Assambleýasynyň Kararnamasy esasynda Türkmenistanda 2025-nji ýylyň Halkara parahatçylyk we ynanyşmak ýyly diýlip yglan edilendigi barada habar berip, Ýylyň çäginde Türkmenistanyň bu ýylyň dowamynda ileri tutuýan ugurlary boýunça geçiriljek çäreleriň Konsepsiýasy bilen tanyşdyrdy.

Ilçi Halkara parahatçylyk we ynanyşmak ýyly, Halkara bitaraplyk güni hem-de Türkmenistanyň hemişelik Bitaraplygynyň 30 ýyllygy mynasybetli 2025-nji ýylyň dekabr aýynda iri halkara forumynyň geçirilmegi esasy waka boljakdygyny belledi.

Duşuşykda GDA-nyň tertipnamalaýyn we beýleki edaralarynyň ýanyndaky Arkalaşyga gatnaşyjy-döwletleriň hemişelik ygtyýarly wekilleri geçen ýylyň dowamynda ýerine ýetirilen işleriň netijelerini jemläp, Geňeşiň 2025-nji ýyl üçin Iş meýilnamasyny tassykladylar. Şeýle-de, 11-nji aprelde Astanada geçirilmegi meýilleşdirilýän GDA-nyň daşary işler ministrleriniň Geňeşiniň indiki mejlisine taýýarlyk işler barada maslahatlaşyldy. Onda howpsuzlyk we ynsanperwer hyzmatdaşlyk meseleleri ara alnyp maslahatlaşylar.