Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Monako Knýazlygyna saparynyň dowamynda 20-nji ýanwarda Şazada Alber II bilen duşuşyk geçirdi.

Duşuşygyň öň ýanynda Şazadanyň köşgünde ýokary derejeli myhman bilen Alber II-niň hem-de Şagyzy Stefaniýanyň bilelikde ýadygärlik surata düşmek dabarasy boldy.

Türkmen halkynyň Milli Liderini mübärekläp, Monako sapar bilen gelmäge çakylygy kabul edendigi üçin hoşallyk bildirip, Şazada Alber II Türkmenistanyň ählumumy gün tertibiniň meselelerini çözmekde başlangyçly orny eýeleýändigini belledi. Hyzmatdaşlyk mümkinçilikleri we halkara syýasatyň wajyp meseleleri boýunça pikir alşyp, taraplar özara hyzmatdaşlygy giňeltmäge ygrarlydygyny tassykladylar.

Dar düzümdäki duşuşygyň dowamynda şeýle hem taraplar ynsanperwer dialogy işjeňleşdirmek we medeniýet, sport, syýahatçylyk ulgamlarynda gatnaşyklary çuňlaşdyrmagyň meselelerini şeýle hem sirk sungaty babatda hyzmatdaşlygy ara alyp maslahatlaşdylar. Bu barada TDH habarlar agentliginiň habarynda beýan edilýär.

Soňra duşuşyk iki ýurduň wekiliýetleriniň gatnaşmagynda giňişleýin düzümde dowam etdi. Şazada Alber II-ä Monako Knýazlygyna gelmäge çakylygy hem-de türkmen wekiliýetine bildirilen myhmansöýerlik we hormat üçin minnetdarlygyny beýan edip, türkmen halkynyň Milli Lideri Prezident Serdar Berdimuhamedowyň adyndan salamyny ýetirdi.

Gurbanguly Berdimuhamedow 2015-nji ýylyň aprelinde Koreýa Respublikasynda Bütindünýä suw forumynyň çäklerinde Şazada Alber II bilen geçiren duşuşygyny ýakymly duýgular bilen ýatlaýandygyny belledi. Şonda ikitaraplaýyn hyzmatdaşlygyň meseleleri we ony ösdürmek üçin mümkinçilikleri ara alnyp maslahatlaşyldy. Şol gepleşikleriň netijeleri boýunça 2015-nji ýylyň awgustynda Türkmenistan bilen Monako Knýazlygynyň arasynda diplomatik gatnaşyklary ýola goýmak baradaky karara gelindi.

Türkmenistanyň dürli ýyllarda Birleşen Milletler Guramasynyň meýdançasynda öňe süren halkara başlangyçlaryny goldaýandygy üçin Monako Knýazlygyna minnetdarlyk bildirip, Türkmenistanyň Halk Maslahatynyň Başlygy munuň ählumumy gün tertibindäki möhüm meselelerine taraplaryň garaýyşlarynyň meňzeşdigini görkezýändigini belledi.

Şunuň bilen baglylykda, BMG-niň Baş Assambleýasynyň Türkmenistanyň başlangyjy bilen 2025-nji ýyly “Halkara parahatçylyk we ynanyşmak ýyly” diýip yglan etmek hakynda Kararnamasyna üns çekildi. Dünýä syýasatynda parahatçylyk ýörelgeleriniň ornaşdyrylmagyna, dartgynlylygy peseltmek üçin şertleri döretmäge, möhüm meseleleri çözmekde jogapkärli hem-de netijeli çemeleşmelere geçmäge gönükdirilen birnäçe wekilçilikli halkara forumlary geçirmek göz öňüne tutulýar. Türkmen halkynyň Milli Lideri Şazada Alber II-ni Halkara parahatçylyk we ynanyşmak ýylyna bagyşlanan foruma gatnaşmak üçin Aşgabada çagyrdy.

Halk Maslahatynyň Başlygy Türkmenistanyň Bitaraplygynyň 30 ýyllygy mynasybetli geçiriljek forumyň gadyrly we hormatly myhmanlarynyň hatarynda Şazada Alber II-ni görmäge şat boljakdygyny aýtdy.

Gurbanguly Berdimuhamedow iki taraplaýyn hyzmatdaşlygyň meseleleriniň hataryna daşky gurşawy goramak meselesiniň girýändigini belledi. Monako “ýaşyl başlangyjy” durmuşa geçirip, Şazada Alber II-niň ýolbaşçylygyndaky gaznanyň suw gurşawynda ummanlary we biodürlüligi goramak ugrunda köp işleri durmuşa geçirdi. Şu nukdaýnazardan türkmen halkynyň Milli Lideri Türkmenistanyň bütin dünýäde howanyň ýagdaýy boýunça gün tertibiniň şu we beýleki ugurlarynda hyzmatdaşlygyň mümkinçiliklerini öwrenmäge taýýardygyny tassyklady.

Hyzmatdaşlygyň ýene bir ugry medeni-ynsanperwer ulgam bolup biler. Türkmen halkynyň Milli Lideri Şazada zenan Greýsiň gaznasy bilen Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň arasynda hyzmatdaşlygy ýola goýmagyň uly geljeginiň bardygyny belledi.

Halk Maslahatynyň Başlygy işewürlik, syýahatçylyk we maliýe ugurlarynda hyzmatdaşlyk üçin ägirt uly mümkinçilikleriň bardygyny nygtady. Bu nukdaýnazardan hyzmatdaşlyk we iş gatnaşyklary üçin usullary döretmek mümkinçiligine seretmegi teklip etdi.

Bilelikdäki hyzmatdaşlygyň möhüm bölegi älem giňişligidir: 10 ýyl mundan ozal Monako Knýazlygy “TürkmenÄlem52°E” türkmen emeli hemrasynyň kosmosa çykmagy üçin uçjak ugruny beripdi. Ikitaraplaýyn şertnamanyň möhletiniň 2030-njy ýylda dolýandygyny aýdyp, oňyn tejribä esaslanyp, türkmen halkynyň Milli Lideri Türkmenistanyň hyzmatdaşlygy dowam etdirmegiň mümkinçiliklerini ara alyp maslahatlaşmaga taýýardygyny tassyklady.

Gurbanguly Berdimuhamedow häzirki wagtda Türkmenistanyň ikinji emeli hemrany döretmegiň üstünde işleýändigini aýtdy we ony älem giňişligine çykarmaga taýýarlamakda bilelikde işlemek mümkinçiliklerini ara alyp maslahatlaşmaga gyzyklanma bildirýändigini belledi.

Şu günler “Galkynyş” milli at üstündäki oýunlar toparynyň Monte-Karloda dowam edýän halkara sirk sungaty festiwalyna gatnaşýandygy bellenildi. Bu ugurda ýurdumyzyň medeni gatnaşyklary has-da ösdürmäge, şol sanda täze ugurlar bilen giňeltmäge taýýardygyny nygtaldy.

Türkmen halkynyň Milli Lideri sporty geljegi uly ugurlaryň hatarynda kesgitledi. Aşgabat “Arkalaşygyň täze sport mümkinçilikleriniň şäheri” diýlip yglan edildi, Monako bolsa 2025-nji ýylda “Dünýäniň sport paýtagty” diýen hormatly ada eýe boldy. Şunuň bilen baglylykda bu möhüm ugurdaky tagallalary birleşdirmek üçin iki ýurduň bar bolan mümkinçilikleri we tejribäni sporty ösdürmek babatda ulanmagy teklip edildi.

Ikitaraplaýyn hyzmatdaşlygyň uly mümkinçiliginiň bardygyny belläp, Şazada Alber II Monakonyň ony täze ugurlar boýunça ösdürmäge ygrarlydygyny tassyklady.

Giňişleýin düzümdäki duşuşyk tamamlanandan soňra, sowgatlary alyşmak dabarasy boldy. Munuň özi ynsanperwer gatnaşyklaryň täze tapgyryna özboluşly badalga bermek bilen, taraplaryň birek-biregiň medeni mirasyna, däp-dessurlaryna gyzyklanma bildirmegiň hem-de özara hormat goýmagyň nyşanyna öwrüldi.

Soňra Türkmenistanyň Halk Maslahatynyň Başlygy Monakonyň Okeanografiýa muzeýine baryp gördi we ondan soň Nissa şäheriniň Halkara howa menziline bardy. Bu ýerde Gurbanguly Berdimuhamedow Monte-Karlodaky halkara sirk sungaty festiwalynda çykyş edip, Altyn baýraga we beýleki ýörite baýraklara mynasyp bolan “Galkynyş” milli at üstündäki oýunlar toparynyň agzalary bilen duşuşdy.

ORIENT