Biz ýakynlaşmagy ugur edinýäris

Türkmenistanyň Prezidenti Serdar Berdimuhamedow Astanada geçirilýän “Merkezi Aziýa - Germaniýa” formatynda ýokary derejedäki ikinji duşuşygyň çäklerinde Germaniýanyň Federal kansleri Olaf Şols bilen duşuşdy.

Türkmenistan bilen Germaniýanyň arasyndaky konstruktiw hyzmatdaşlygynyň başynda duran türkmen halkynyň Milli Lideri, Türkmenistanyň halk Maslahatynyň Başlygy Gurbanguly Berdimuhamedowyň adyndan dostlukly ýurduň hökümetiniň başlygyna gutlag sözlerini beýan edip, Prezident Serdar Berdimuhamedow “Merkezi Aziýa - Germaniýa” dialogynyň barşyndaky Germaniýanyň Federal kansleri Olaf Şols bilen şu günki ilkinji ikitaraplaýyn duşuşygy türkmen-german gatnaşyklarynyň mundan beýläk ösdürilmegine mümkinçilik berjekdigine ynam bildirdi diýip, “TDH” habar berýär.

Germaniýanyň Federatiw Respublikasynyň hökümet Başlygy öz gezeginde hem türkmen-german gatnaşyklaryny ösdürmekde öz ägirt uly goşandyny goşan Türkmenistanyň Halk Maslahatynyň Başlygyna gutlaglaryny we iň gowy arzuwlaryny ýollap, Türkmenistan bilen netijeli hyzmatdaşlygy mundan beýläk berkitmekde öz ýurdunyň gyzyklanma bildirýändigi barada belläp geçdi.

Prezident Serdar Berdimuhamedow iki ýurduň arasyndaky gatnaşyklaryň 90 şertnamasyny we ylalaşygyny öz içine alýan berk hukuk binýadyna esaslanýan yzygider we uzakmöhletleýin esasda ösdürilýändigi barada belledi.

Ikitarplaýyn ykdysadyýet günleriniň, işewür maslahatlarynyň we ykdysadyýet sergileriniň yzygider häsiýetini belläp, Prezident Serdar Berdimuhamedow döwletara hyzmatdaşlygynyň ösdürilmegi üçin tagallalary edýän Bilelikdäki türkmen-german iş toparynyň we German ykdysadyýetiniň gündogar komitetiniň ähmiýetli orny barada nygtap geçdi.

ORIENT news

Foto: tdh.gov.tm