Gazagystanyň oba mekdepleri emeli hemra internetine birikdiriler

08.11.2023 | 18:01 |

Gazagystanyň oba ýerlerindäki 10 sany mekdebi synag görnüşinde ABŞ-nyň “SpaceX” kompaniýasynyň giň ýygylykly “Starlink” tehnologiýasyna birikdirildi. Bu barada Gazagystanyň Hökümetiniň iş maslahatynda mälim edildi.

Şeýlelikde, hemra interneti üçpjün edilen mekdeplerde maglumatlaryň geçirilişi sekuntda 200 megabite ýetýär. Umuman alanyňda, Ilon Maskyň hödürleýän internet hyzmatlar ulgamyna Gazagystanyň oba ýerlerindäki 2 müň sany mekdep birikdiriler. Ýurduň sanly ösüş, innowasiýalar we aerokosmos senagaty ministri Bagdat Musiniň mälim etmegine görä, “SpaceX” bilen baglaşyljak şertnamanyň düzgünleri heniz belli däl.

Gazagystanyň aragatnaşyk operatorynyň habar bermegine görä, ýurduň obalarynyň 67 göterimi ýokary tizlikli internet bilen üpjün edilendir. Şol obalaryň 2813-si 3G mobil tehnologiýalary, 2045-si hem 4G ulgamyna birikdirilendir. Obalaryň 1950-si “ADSL” (modem tehnologiýasy) ulgamy we ýene 2606-sy optiki süýümli aragatnaşyk ulgamy boýunça internete birikdirilendir.

Mundan ozal, Gazagystanda “Elýeterli internet” milli taslamasy tassyklanyldy. Bu taslama ýurdu ähli ilatyny 2027-nji ýyla çenli ýokary tizlikli internet bilen üpjün etmegi maksat edinýär.

ORIENT news