Biz ýakynlaşmagy ugur edinýäris

"Google Foto" goşundysynda ulanyjylaryň öz surat ýatlamalaryny döredijilikli görnüşde üýtgetmegine mümkinçilik berýän innowasion funksiýalar peýda boldy. Esasy täzelikleriň arasynda suratlary gysga wideolara öwürmek hem-de şekilleri anime, komiks, eskiz ýa-da hatda 3D animasiýa görnüşine stilizasiýa etmek mümkinçiligi bar.

Bu täze gurallar «Döretmek» (Create) atly bölümde elýeterlidir. Bu bölümde kollaž döretmek we wideo bilen işlemek ýaly öň bar bolan mümkinçilikler hem saklanyp galypdyr.

"Google Foto" — Google-yň iň meşhur sarp ediji hyzmatlarynyň biridir we 1,5 mlrd-dan gowrak ulanyjysy bar. TechCrunch neşiriniň bellemegine görä, AI (emeli aň) funksiýalarynyň ornaşdyrylmagy diňe bir goşundynyň mümkinçiliklerini giňeltmän, eýsem giň köpçüligini hem emeli aň tehnologiýalary bilen tanyşdyrýar. Bu ýagdaý Google üçin öz AI modellerini öwrenmekde gymmatly maglumat binýadyny döredýär.

Kompaniýa täze AI gurallarynyň synag görnüşindedigini belleýär. Ulanyjylara döredilen AI mazmuny barada pikir-garaýyşlaryny paýlaşmak teklip edilýär, bu bolsa geljekde önümi kämilleşdirmäge kömek eder.

Gemini we YouTube platformalarynda eýýäm elýeterli bolan «Suratdan wideo» (Photo to Video) funksiýasy, Google-nyň Veo 2 AI modeli esasynda suratlardan 6 sekuntlyk wideolar döretmäge mümkinçilik berýär. Bu mümkinçilik şu günden başlap, ABŞ-da Android we iOS enjam ulanyjylary üçin elýeterlidir. Suratlary stilizasiýa etmek üçin niýetlenen «Remiks» funksiýasy bolsa indiki hepdelerde ABŞ ulanyjylaryna hödürlener.

Bu iki funksiýa arkaly döredilen faýllara emeli aň tarapyndan döredilendigini görkezýän, göze görünmeýän sanly suw belgisi — SynthID goşular. «Döretmek» bölümi ABŞ-daky ulanyjylarda awgust aýynda peýda bolar, Google bolsa görkezilýän mümkinçilikleri yzygiderli täzeläp we kämilleşdirip durmagy meýilleşdirýär.

ORIENT

Foto: hi-tech.mail.ru