“Türkmengaz” Germaniýanyň metan zyňyndylaryna gözegçilik etmek tejribesini öwrenýär
29.05.2025 | 20:30 |
“Türkmengaz” döwlet konserniň we Türkmenistanyň Daşky gurşawy goramak ministrliginiň wekilleri, Ählumumy metan borçnamasy boýunça metanyň zyňyndylaryna gözegçilik etmek we hasabat bermek maksady bilen Berlinde (Germaniýa) geçirilen okuw saparyna gatnaşdylar. Bu sapar ÝHHG-niň goldawy bilen guralyp, 27-29-njy maý aralygynda amala aşyryldy.
ÝHHG-niň Aşgabatdaky Merkezi we ÝHHG-niň ykdysady we daşky gurşaw çäreleriniň utgaşdyryjysynyň edarasy bilen bilelikde guralan bu saparyň maksady metanyň zyňyndylaryny dolandyrmakda öňdebaryjy tejribäniň we innowasion çemeleşmeleriň alyş-çalşygyndan ybarat boldy.
Berlinde türkmen wekiliýeti Ykdysadyýet we energetika boýunça Federal ministrliginiň, Germaniýanyň Daşky gurşaw boýunça agentliginiň we beýleki degişli guramalaryň wekilleri bilen duşuşyklar geçirdi. Bu duşuşyklaryň dowamynda Germaniýanyň metanyň zyňyndylaryny azaltmak boýunça üstünlikli strategiýalary ara alnyp maslahatlaşyldy.
Metanyň zyňyndylaryna gözegçilik etmekde ýöriteleşen “AIRMO” kompaniýasyna baryp görülmegi maksatnamanyň möhüm bölegi boldy. Türkmen hünärmenleri ýangyç bekedinde metanyň gözegçiliginiň göni görkezilişini, şeýle hem “AIRMO”-nyň metanyň syzyşlaryny ýüze çykarmak we ýok etmek boýunça hyzmatlaryny görmäge mümkinçilik aldylar.
ÝHHG-niň Aşgabatdaky Merkeziniň Ykdysady we daşky gurşaw bölüminiň müdiri Oliwera Zurowak-Kuzman, bu saparyň Merkeziň metanyň zyňyndylaryny azaltmak we kadalaşdyrmak babatynda alyp barýan goldawynyň bir bölegidigini aýtdy. Bu saparyň, türkmen hünärmenleriniň Ählumumy metan borçnamasy bilen baglanyşykly borçnamalary netijeli ýerine ýetirmek ukybyny güýçlendirjekdigine ynam bildirdi.
Saparyň dowamynda Türkmenistanyň wekilleri nemes kärdeşleri bilen metanyň zyňyndylary baradaky ÝB-niň kanunlary we düzgünleri, Germaniýanyň degişli syýasatlary işläp düzmek we durmuşa geçirmek tejribesi, şeýle hem bu ugurda standartlaryň we sertifikatlaryň ähmiýeti barada pikir alyşdylar.
ORIENT
