Türkmen ýaşlaryna migrasiýanyň we durnukly ösüşiň arabaglanyşygy görkezildi Orient

Türkmen ýaşlaryna migrasiýanyň we durnukly ösüşiň arabaglanyşygy görkezildi

08.04.2025 | 13:25 |

Türkmenistanda “Halkara parahatçylyk we ynanyşmak ýyly” mynasybetli geçirilýän çäreleriň çäklerinde Migrasiýa boýunça Halkara guramasynyň Türkmenistandaky wekilhanasy Türkmenistanyň Daşary işler ministrliginiň Halkara gatnaşyklar institutynda “Migrasiýa boýunça Halkara guramasy: ösüş üçin modelleriň gurulmagy” atly umumy sapagy geçirdi. Bu barada BMG-niň Hemişelik utgaşdyryjysynyň Türkmenistandaky edarasynyň saýtynda habar berilýär.

Çärä Türkmenistanyň Daşary işler ministrliginiň Halkara gatnaşyklar institutynda, Magtymguly adyndaky Türkmen döwlet uniwersitetinde hem-de Halkara ynsanperwer ylymlary we ösüş uniwersitetinde hukugy we halkara gatnaşyklary öwrenýän 160 golaý talyplary gatnaşdylar.

Migrasiýa boýunça Halkara guramasynyň Merkezi Aziýa boýunça utgaşdyryjysy Serhan Aktoprak Migrasiýa boýunça Halkara guramasy we umuman migrasiýa baradaky gyzykly maglumatlar bilen paýlaşdy. Talyplar howpsuz, düzgünleşdirilen we kanuny migrasiýa üçin Migrasiýa boýunça Halkara guramasy hökümet, hökümetara we hökümete degişli bolmadyk hyzmatdaşlary bilen özara gatnaşyklary baradaky bilimlerini giňeltdiler.

Migrasiýa boýunça Halkara guramasynyň Türkmenistanda alyp barýan işi barada söz açmak bilen, Serhan Aktoprak migrasiýany dolandyrmagyň dürli ugurlary, şol sanda howanyň üýtgemegine uýgunlaşmak boýunça gün tertibi, kanuny däl migrasiýa garşy göreş alyp barmak, adatdan daşary ýagdaýlara taýýarlygy we olara täsir etmek babatda hökümet bilen netijeli hyzmatdaşlyk barada belledi.

ORIENT news