«Oskar» baýragyna bolan gyzyklanma

19.01.2025 | 00:25 |

2024-nji ýylyň iň gowy filmlerini sylaglamak maksady bilen 2025-nji ýylyň mart aýynyň başynda geçiriljek Amerikan Kino Sungaty we Ylym Akademiýasynyň 97-nji “Oskar” baýragynyň gowşurylyş dabarasynyň töwereginde gyzgalaňly jedeller başlandy. Meşhur ýazyjy Stiwen King Los-Anjelesde bolup geçen pajygaly ýagdaý sebäpli “Oskar” dabarasynyň ýatyrylmagyny talap etdi. Beýleki tarapdan bolsa, käbirleri bu dabaranyň güýçli ýangynlardan ejir çeken şäher ilaty üçin ruhlandyryjy we ünsüni başga zada sowmak üçin gowy mümkinçilik bolup biljekdigini aýdýarlar.

“Oskar” baýragynyň gowşurylyş dabarasy ilkinji gezek 1929-njy ýylda Los-Anjelesdäki “Ruzwelt” myhmanhanasynda, Akademiýanyň ýapyk banketinde geçirilipdi. 1930-njy ýylda bu dabaranyň ilkinji radiodaky ýaýlymy amala aşyryldy, 1953-nji ýylda bolsa telewideniýede ilkinji gezek görkezildi.

Amerikan Kino Akademiýasy eýýäm 97-nji “Oskar” dabarasyna taýýarlyk gördi. On kategoriýa boýunça iň gowy işler üçin gysgaldylan sanaw çap edilip, kinofilmleriň dünýäsi üçin ýylyň iň esasy wakasyna çenli resmi taýdan wagt sanawy başlady. 2025-nji ýylyň 23-nji ýanwarynda “Oskar” baýragyna dalaşgärleriň atlary yglan ediler. Köpçülikleýin habar beriş serişdelerinde bolsa, nominasiýalar we ähtimal ýeňijiler bilen bagly başga maglumatlar giňden gürrüň edilýär.

97-nji “Oskar” dabarasy birnäçe täzelikleri bilen tapawutlanar. Ilkinji gezek dabaranyň göni ýaýlymda görkezilmegi üçin Hulu platformasy ulanylar.

Mundan başga-da, dabarany meşhur telewideniýe alyp baryjysy, ssenarist we komik Konan O’Braýen alyp barar. Şeýle hem, bu ýyldan başlap, doly metražly filmleriň “Iň gowy film” nominasiýasyna hödürlenmegi üçin iň azyndan ABŞ-nyň kino üçin ýokary tomaşaçy akymyna eýe bolan 50 bazarynyň 10-synda bir hepdelik görkezilişi bolmaly.

Bu ýyl Kinematografiýa Akademiýasy soňky gezek ýeňijileri 23 kategoriýa boýunça yglan eder. 2026-njy ýyldan başlap, täze bir kategoriýa – “Iň gowy kasting” goşular. Şeýle hem, kaskadýorlary we dürli çylşyrymly trýuk goýujylaryny sylaglamaga başlajakdygy barada çaklamalar bar. Kinoçylaryň arasynda bu täzelikleriň 2025-nji ýylyň “Oskar” dabarasynda yglan edilip-edilmejegi gyzgalaň bilen garaşylýar.

ORIENT