Biz ýakynlaşmagy ugur edinýäris

ORIENT Türkmenistanda ylmy işgärleri taýýarlamak maksatnamasy boýunça okuwa girýänler üçin peýdaly boljak resmi resminamalardan alnan maglumatlary bir materialda jemledi.

Arzalary kabul etmegiň we synaglaryň senesi

Aspirantura, doktorantura we dalaşgärligi berkitmeklige arzalary kabul etmek 2023-nji ýylyň 1-nji fewralyndan 28-nji fewralyna çenli amala aşyrylýar.

Aspirantura giriş synaglary, doktorantura we dalaşgärlige kabul etmek çäreleri 2023-nji ýylyň 1-nji martyndan 24-nji martyna çenli amala aşyrylýar.

Aspirantura, doktorantura we dalaşgärligiň hasabyna goşmak 2023-nji ýylyň 1-nji aprelinden amala aşyrylýar.

Aspirantura girýänler üçin

Aspirantura ýokary bilimi we azyndan 5 ýyl iş tejribesi bolan, saýlanyp alnan ugurda ylmy gözlegleri geçirmekde başarnygy bolan adamlar kabul edilýär.

Lukmançylyk ylmy ugry boýunça aspirantura kliniki ordinaturany doly geçen we saglygy goraýyş ulgamynda azyndan 3 ýyl ýa-da kliniki ordinaturany geçmezden, azyndan 5 ýyl işlän şahslar bäsleşik esasynda kabul edilýär.

Aspirantura girmek hakynda ýokary okuw jaýynyň rektorynyň adyna ýa-da aspirantlary taýýarlamagy amala aşyrýan ylmy edaranyň ýolbaşçysynyň adyna arza ýazylýar.

Arzanyň ýanyna aşakdaky resminamalar goşulýar:

– ýokary bilim hakyndaky diplomyň nusgasy we onuň goşundysy (daşary ýurtda bilim alanlar üçin – diplomyň nusgasy we bilim baradaky daşary ýurt döwletleriniň Türkmenistanyň bilim ministrligi tarapyndan berlen ýokary bilim baradaky diplomyň deň derejeliligi hakyndaky şahadatnama);
– işgärleri hasaba almak boýunça şahsy kagyz;
– № 086/h görnüşli lukmançylyk güwänamasy;
– 4х6 sm ölçegdäki üç sany fotosurat;
– neşir edilen ylmy işleriň, oýlap tapmalaryň we ylmy-barlag işi baradaky hasabatlaryň sanawy (bar bolsa);
– saýlanyp alnan tema boýunça ylmy referat;
– zähmet depderçesiniň nusgasy.

Şahsyýeti tassyklaýan resminamany we ýokary okuw jaýyny tamamlandygy hakynda diplomy aspirantura girýän raýat getirip görkezýär.

Doktorantura girýänler üçin

Doktorantura ylymlaryň kandidaty derejesi bar bolanlar, ýokary okuw jaýynyň alymlar geňeşiniň ýa-da hünär ugrundan ylmy guramanyň doktorlyk dissertasiýasynyň 2/3 ýerine ýetirilendigi barada kepilnamasy bolanlar, şeýle hem Alymlar geňeşi tarapyndan berlen hödürnamasy bolanlar bäsleşik esasynda kabul edilýär.

Doktorantura girýänler doktoranturanyň döredilen guramanyň ýolbaşçysynyň adyna arza bilen ýüz tutýarlar.

Arza şu aşakdaky resminamalar goşulýar:

– işgärleri hasaba almak boýunça şahsy kagyz;
– terjimehal;
– № 086/h görnüşli lukmançylyk güwänamasy;
– 4х6 sm ölçegdäki üç sany fotosurat;
– ylymlaryň kandidatynyň diplomynyň nusgasy;
– zähmet depderçesiniň nusgasy;
– neşir edilen ylmy işleriň, oýlap tapmalaryň patentleriň sanawy we nusgasy, ýerine ýetirilen ylmy barlaglar we işläp taýýarlamalary hakyndaky hasabatlaryň sanawy;
– üç ýyla bölünen doktorlyk dissertasiýasynyň taýýarlanyş meýilnamasy;
– ýokary okuw jaýynyň Alymlar geňeşiniň ýa-da dissertasiýanyň hünär ugurdan ylmy barlaglary alyp barýan ylmy edaranyň doktorlyk dissertasiýanyň 2/3 taýýardygy baradaky kepilnamasy;
– ýokary okuw jaýynyň Alymlar geňeşi ýa-da hünäri boýunça ylmy gurama tarapyndan berlen hödürnama;
– ylmy barlaglarynyň ugry dissertasiýanyň temasyna ýakyn bolan iki sany ylymlaryň doktorynyň seslenmesi, ýagny onda temanyň derwaýyslygy we ylmy taýdan esaslylygy we dissertasiýany taýýarlamagyň çak edilýän meýilnamasy we ony üç ýylda ýerine ýetirmegiň mümkinçilikleri görkezilip, bahalandyrylmaly.

Şahsyýeti tassyklaýan resminamany we ylymlaryň kandidaty alymlyk derejesiniň berlendigi hakyndaky diplomy doktorantura girýän raýat getirip görkezýär.

Doktoranturada okamagyň möhleti 3 ýyldyr.

Ylymlaryň kandidaty alymlyk derejesine dalaşgärleri berkitmek üçin

Ylymlaryň kandidaty alymlyk derejesine dalaşgärler ýokary bilimli şahs bolmaly.

Aspiranturada doly okuwy geçenler ylymlaryň kandidaty alymlyk derejesine dalaşgär hökmünde kabul edilmeýär.

Bir wagtyň özünde iki ýa-da birnäçe ýokary okuw mekdebinde ýa-da ylmy edarada dalaşgär bolmaga rugsat edilmeýär.

Ylymlaryň kandidaty alymlyk derejesine berkitmek üçin dalaşgär şu aşakdakylary tabşyrmaly:

– ýokary okuw mekdebiniň rektorynyň ýa-da ylym-barlag edarasynyň ýolbaşçysynyň adyna arza;
– saýlanan tema boýunça ylmy referat;
– ýokary bilim baradaky diplomyň nusgasy (daşary ýurtda ýokary bilim alanlar üçin – diplomy nusgasy we Türkmenistanyň bilim Ministrligi tarapyndan berlen onuň deň derejeliligi hakyndaky şahadatnama).

Şahsyýeti tassyklaýan resminamany we ýokary bilim hakyndaky diplomy dalaşgäriň özi getirip görkezýär.

Kandidatlyk dissertasiýasyny taýýarlamak üçin dalaşgärleri berkitmek üç ýyldan köp bolmadyk möhlet bilen amala aşyrylýar.

Ylymlaryň doktory alymlyk derejesine dalaşgär hökmünde hasaba almak üçin

Ylymlaryň doktory alymlyk derejesine dalaşgäriňylymlaryň kandidaty derejesi bolmaly.

Ýokary okuw jaýynda ýa-da ylmy edarada berkidilmek üçin ylymlaryň doktory alymlyk derejesini goramak isleýän tarapyndan ýolbaşçynyň adyna aşakdaky resminamalar tabşyrylýar:

– ylymlaryň kandidaty diplomynyň nusgasy goşulan arza;
– ylmy barlagy dissertasiýanyň hünär ugry boýunça alyp barýan ýokary okuw jaýynyň ýa-da ylmy guramanyň Alymlar geňeşiniň dissertasiýanyň 2/3 taýýardygy baradaky kepilnamasy.

Şahsyýeti tassyklaýan resminamany we ylymlaryň kandidaty diplomyny dalaşgäriň özi getirip görkezýär.

Doktorlyk dissertasiýasyny taýýarlamak üçin dalaşgärleri ýokary okuw jaýynda ýa-da ylmy gurama berkitmek 4 ýyldan köp bolmadyk möhlet bilen amala aşyrylýar.

ORIENT
Surat redaksiýanyň arhiwinden

Foto: Surat redaksiýanyň arhiwinden