Biz ýakynlaşmagy ugur edinýäris

Maýa Kulyýewa adyndaky Türkmen milli konserwatoriýasynda 27-nji fewralda ajaýyp aýdymçy, Türkmenistanyň halk artisti Medeniýet Şahberdiýewanyň 95 ýyllygyna bagyşlanan konsert geçiriler. Konsert maksatnamasynyň öň ýanynda sahnada onuň bilen bile çykyş eden hem-de meşhur aýdymçynyň döredijiligi bilen ýakyndan tanyş bolan kärdeşleriniň çykyşlary bolar. Konserwatoriýanyň professory, Türkmenistanyň halk artisti Atageldi Garyagdyýew Medeniýet Şahberdiýewa hakyndaky ýatlamalary bilen paýlaşar.

Konsertde Medeniýet Şahberdiýewanyň repertuaryndan dünýä we milli operanyň nusgawy eserleriniň bölekleri, şeýle hem meşhur aýdymlary ýerine ýetiriler. Olaryň arasynda Wolfgang Amadeý Mosartyň «Figaronyň toýy» operasyndan ariýa, şeýle hem türkmen kompozitorlarynyň operalaryndan ariýalar we duetler bar: Weli Muhadowyň «Ganly saka», Nury Muhadowyň «Keýmir Kör», Adrian Şapoşnikow we Daňatar Owezowyň «Şasenem we Garyp», Daňatar Owezow we Ýuliý Meýtusyň «Leýli we Mejnun», Rejep Rejepowyň «Görogly» operalaryndan eserler ýerine ýetiriler.

Ilkinji gezek hut Medeniýet Şahberdiýewa tarapyndan ýerine ýetirilen Nury Halmämmedowyň meşhur «Aşgabat» aýdymyny konsertde Atageldi Garyagdyýewiň ýerine ýetirmeginde ýaňlanar. Şeýle hem Anton Delwiginiň sözlerine döredilen, Aleksandr Alýabýewiň «Bilbil» romansyny Türkmenistanyň at gazanan artisti Aýna Seýitkulyýewa ýerine ýetirer. Konsert maksatnamasyna Weli Muhadowyň «Jan Türkmenistan», Çary Nurymowyň «Saňa garaşýaryn» ýaly aýdymlary we beýleki eserler hem girizildi.

Medeniýet Şahberdiýewa ajaýyp owazly sesi üçin «türkmen bilbili» diýlip atlandyrylýardy. Ol 1930-njy ýylyň 23-nji fewralynda adaty türkmen maşgalasynda dünýä indi we Mary çagalar öýünde terbiýelendi. Zehinli gyz çaga Respublikanyň çagalar ýöriteleşdirilen sazçylyk mekdep-internatynyň skripka bölüminiň okuwçysy boldy. Emma onuň täsin ses zehini üstün çykyp, ol Çaýkowskiý adyndaky Moskwa konserwatoriýasynda hünär derejesinde ösdürildi. Medeniýet Şahberdiýewa bu konserwatoriýany gyzyl diplom bilen tamamlady.

Kärdeşleriniň we muşdaklarynyň ýatlamalaryna görä, Medeniýet Şahberdiýewa özboluşly şahsyýet bolup, onuň gözelligine we zehinine bagyşlap kompozitorlar we suratkeşler öz eserlerini döredipdirler.

Nury Halmämmedow adyndaky Moskwa Halkara «Dutar owazlary» festiwalynyňsungat ýolbaşçysy, kompozitor Mämmet Guseýnow Medeniýet Şahberdiýewa bilen tanyşlygyny we aragatnaşygyny täsinlik hasaplaýar. Onuň aýtmagyna görä, Şahberdiýewa haýsy ugurda çykyş etse-de, islendik meselede, pedagogik işinde, kärdeşleri, ýakynlary bilen gatnaşykda hem-de ähli hereketlerinde kämilligiň nusgasydy. Onuň özboluşly ruhy kuwwaty sebäpli birnäçe nesil sazandalaryň, onuň onlarça okuwçysynyň sungatda beýik maksatlara ymtylmagyna sebäp boldy. Onuň döredijiligi sazandalar üçin doly derejede nusgalykdy.

Myrat Diwanowyň ýatlamalarynda bolsa, Medeniýet Şahberdiýewa hoşniýetli we duýgur kärdeş, ruhubelent hem-de şadyýan adam bolup ýadynda galypdyr. Ol başgalara kömek etmek üçin elinden gelenini edýärdi. Ol ömrüniň ahyryna çenli konserwatoriýada mugallym bolup işledi. Ol öz kärini gaty gowy görýärdi, talyplaryna söýgi bilen çemeleşýärdi we özüni sapaklaryna doly bagyş edýärdi. Ol okuwçylarynda sungata bolan söýgini ösdürmegi başardy. Şonuň üçin hem onuň okuwçylary oňa hormat we minnetdarlyk bilen çemeleşýärdiler. «Türkmen bilbiliniň» ajaýyp zehini diňe bir Türkmenistanda däl, eýsem bütin Sowet Soýuzynda hem ykrar edildi. Oňa Germaniýada, Fransiýada, Polşada, Hindistanda, Kanadada we Şwesiýada hem el çarpýardylar.

ORIENT

Foto: orient.tm