Biz ýakynlaşmagy ugur edinýäris

ÝUNISEF-iň Türkmenistandaky wekili Jalpa Ratna Lebap welaýatynyň taryhy-ülkäni öwreniş muzeýine baryp gördi. Muzeýiň işgärleri myhmana muzeý sergileri barada gürrüň berdiler. Olar sebitiň häzirki ösüşini we ykdysady ösüşini görkezmek bilen birlikde, onuň taryhyny, medeni mirasyny we tebigy aýratynlyklaryny hem şöhlelendirýär.

ÝUNISEF-iň wekilinde muzeýde görkezilen milli egin-eşik we şaý-sepler toplumy uly täsir galdyrdy. Şeýle hem, türkmen zenanlarynyň çäksiz döredijilik ukybyny we ajaýyp sungat duýgusyny görkezýän milli el işleriniň köpdürlüligi baradaky gürrüň myhman üçin aýratyn gyzykly boldy.

Lebap welaýatynyň taryhy-ülkäni öwreniş muzeýi 1967-nji ýyldan bäri hereket edýär. 2011-nji ýylyň sentýabr aýynda muzeýiň täze binasy açyldy. Täze muzeýde işiň ýokary derejede guralmagy üçin ähli şertler döredildi. Muzeýde sinhron terjime enjamlary we wirtual gezelençleri geçirmek üçin döwrebap tehnologiýalar gurnaldy. Onuň gaznalarynda 20 müňden gowrak eksponat saklanýar.

Muzeýiň Garaşsyzlyk döwrüne bagyşlanan bölümi welaýatdaky syýasy we durmuş-ykdysady ösüş bilen baglanyşykly maglumatlary, fotosuratlary we ylmy maglumatlary öz içine alýar. Etnografiýa bölüminde gadymy türkmen durmuşyna degişli medeni we maddy gymmatlyklar sergilenýär. Witrinalarda oba hojalygynyň, maldarçylygyň, senetçiligiň we halyçylyk sungatynyň ösüşini şöhlelendirýän eksponatlar görkezilýär. Şeýle hem, Beýik Ýüpek ýolunyň söwda ýollarynda ýerleşen gündogar bazarynyň görnüşleri görkezilýär.Muzeýiň myhmanlarynyň ünsüni has köp çekýän eksponatlar – altyn-kümüş şaý-sepler, haly önümleri, mis, keramika we agaç gap-gaçlar, keteni matadan tikilen milli egin-eşikler, nagyşly ellikler, zenan ýapynjalary, saz gurallary hem-de zähmet esbaplarydyr.

Tebigat bölüminde Lebap welaýatynyň Repetek, Amyderýa we Köýtendag goraghanalarynyň ösümlik we haýwanat dünýäsi bilen tanyşmak mümkin. Muzeýiň iň täsin eksponatlarynyň biri bolsa, 150 million ýyllyk dinozawryň aýak yzynyň daşlaşan nusgasydyr. Bu nusga Hojapil obasyndan alynypdyr.

Arheologiýa bölüminde Amul gadymy şäheri, Astana baba we Alamberdar mawzoleýleri, Idris baba medresesi, Daýahatyn kerwensaraýy, Dargangala ýadygärligi, şeýle hem keramiki önümler, palçykdan ýasalan zenan şekilleri, pil süňküniň galyndylary we beýleki gadymy arheologik tapyndylar bilen tanyşmak mümkindir.

ORIENT

Foto: medeniyet.gov.tm