Biz ýakynlaşmagy ugur edinýäris

2025-nji ýylyň 22-nji ýanwarynda Minsk şäherinde Garaşsyz Döwletleriň Arkalaşygynyň (GDA) Ýerine ýetiriji komitetinde Täjigistan Respublikasynyň başlyklyk etmeginde Arkalaşygyň düzgünnamalaýyn we beýleki edaralarynda agza döwletleriň Hemişelik doly ygtyýarly wekilleriniň geňeşiniň şu ýylky ilkinji mejlisi geçiriler. Mejlise GDA-nyň Baş sekretary Sergeý Lebedew we Täjigistanyň Daşary işler ministrliginiň GDA ýurtlary boýunça Müdirliginiň başlygy, Täjigistanyň Şanhaý hyzmatdaşlyk guramasy boýunça milli utgaşdyryjysy Ahmat Saidmurodzoda gatnaşar. Ol Täjigistanyň 2025-nji ýylda Garaşsyz Döwletleriň Arkalaşygyna başlyklyk etmegiň Konsepsiýasyny we ony durmuşa geçirmek boýunça Çäreleriň meýilnamasyny hödürlär.

Mejlisiň gün tertibinde Hemişelik doly ygtyýarly wekilleriniň geňeşiniň geçen ýylky işleriniň netijelerini jemlemek, şeýle-de 2025-nji ýyl üçin iş meýilnamasyny tassyklamak göz öňünde tutulýar. Mundan başga-da, Geňeş agzalary GDA daşary işler ministrleriniň Geňeşiniň nobatdaky mejlisiniň gün tertibi taslamasyny ara alyp maslahatlaşarlar. Şeýle-de, Arkalaşygyň mundan beýläkki ösüş Konsepsiýasyny durmuşa geçirmek boýunça esasy çäreleriň meýilnamasynyň ýerine ýetirilişi bilen bagly meseleler ara alnyp maslahatlaşylar. Türkmenistanyň HWWG-de wekilçiligini Türkmenistanyň Belarus Respublikasyndaky Adatdan daşary we Doly ygtyýarly Ilçisi Nazarguly Şagulyýew amala aşyrýar.

Täjigistan Garaşsyz Döwletleriň Arkalaşygynyň başlyklygyny Russiýa bilen çalyşdy. 2025-nji ýylda Arkalaşygyň ýolbaşçylygynyň orunbasarlary Russiýa Federasiýasy we Türkmenistan geljekki GDA başlygy hökmünde çykar.

Täjigistanyň Prezidenti Emomali Rahmon 2024-nji ýylyň oktýabr aýynda Moskwa şäherinde geçirilen GDA-nyň döwlet Baştutanlarynyň Geňeşiniň mejlisinde Arkalaşygyň işini kämilleşdirmek boýunça gepleşikleriň başlanmagynyň Täjigistanyň başlyklygynyň esasy ileri tutulýan ugurlarynyň biri boljakdygyny belledi. Onuň sözlerine görä, Täjigistan GDA ýurtlarynyň arasyndaky hyzmatdaşlygy güýçlendirmekde we howpsuzlyga abanýan töwekgelçiliklere garşy göreşmekde möhüm ädimleri ätmäge taýýardyr.

Rahmon Täjigistanyň GDA-da başlyklyk eden döwründe Beýik Watançylyk urşunda Ýeňişiň 80 ýyllygynyň bellenilmegine aýratyn ähmiýet beriljekdigini nygtady. Mundan başga-da, Täjigistan Arkalaşygyň çäklerinde ykdysady, ekologik, medeni-ynsanperwer meseleleriň we parlamentara hyzmatdaşlygyň ösdürilmegini ileri tutýar.

Bu tema boýunça ýene-de okap bilersiňiz:

Täjigistan: GDA-da hyzmatdaşlygynyň täze ugurlary we Türkmenistan bilen ikitaraplaýyn gatnaşyklar

Туркменистан будет сопредседателем в СНГ в 2025 году

Bilermenleriň Duşenbedäki maslahatynyň nazaryndan Merkezi Aziýanyň geosyýasy landşaftyna garaýyş

Emomali Rahmon Merkezi Aziýa ýurtlarynyň Duşanbe şäherinde Senagat ministrleriniň ilkinji duşuşygyny geçirmegi teklip etdi

ORIENT news

Foto: belta.by