Maýa Kulyýewa adyndaky Türkmen milli konserwatoriýasynyň talyplary we mugallymlary tarapyndan taýýarlanan "Çagalyk güni" atly konsert 31-nji maýda Aşgabatda geçiriler. Aýdym-saz agşamy her ýyl 1-nji iýunda bütin dünýäde bellenilýän Çagalary goramagyň halkara gününe bagyşlanýar.
Türkmenistanyň Belgiýadaky ilçihanasy Brýusselde Bütindünýä welosiped güni mynasybetli köpçülikleýin welosiped ýörişini guraýar. Ilçihanada: "Bu her ýyl geçirilýän çäre sagdyn durmuş ýörelgesini, daşky gurşawy goramak düşünjesini, halklaryň arasyndaky dost-doganlyk ruhuny kämilleşdirmek üçin ajaýyp mümkinçilikdir" – diýip bellediler.
Çarşenbe güni, 24-nji maýda Türkmenistanyň Döwlet haryt-çig mal biržasyndaky söwdalaşyklarda jemi bahasy $3,5 mln amerikan dollaryna deň bolan 12 geleşik baglaşyldy – diýip, ORIENT-iň habarçysy habar berýär.
Türkmenistanyň Oguzhan adyndaky inžener-tehnologiýalar uniwersitetiniň mugallymlary we talyplary Aşgabadyň we ýurduň welaýatlarynyň gutardyş synplarynyň okuwçylary üçin tanyşdyrylyş we hünäre ugrukdyrmak duşuşyklaryny geçirdiler.
Ykdysady hyzmatdaşlyk we ösüş guramasy ýörite görkezijileri girizmek arkaly söwda amallaryny ýönekeýleşdirmekde Türkmenistana goldaw berýär. Bu barada Ykdysady hyzmatdaşlyk we ösüş guramasynyň bütindünýä gatnaşyklar we hyzmatdaşlyk direktoratynyň Ýewraziýa bölüminiň Merkezi Aziýa ýurtlary boýunça taslamalaryň ýolbaşçysy Gregori Lekomta salgylanyp, Trend ýazýar.
26-njy maýdan 4-nji iýun aralygynda ÝB-niň Türkmenistandaky wekilhanasy Ýewropa kinofilmleriniň görkezilişini we surata düşürmek, şeýle hem dokumental filmleri taýýarlamak boýunça ussatlyk sapaklarynyň birnäçesini geçirer.
TT Meridian halkara logistika we söwda kompaniýasy «Türkmenistan» uçar kompaniýasynyň Beýik Britaniýa bilen Wýetnamyň arasyndaky ýük gatnatma uçuşlarynyň artdyrylmagy ugrunda çykyş etdi – diýip, Air Cargo Week habar berýär.
Türkmenistanyň Ministrler Kabinetiniň ýanyndaky Ulag we kommunikasiýalar agentliginiň «Türkmenaragatnaşyk» agentliginiň politehniki orta hünär mekdebinde 26-njy noýabry «Bütindünýä durnukly ulag güni» diýlip yglan edilmegi mynasybetli maslahat geçirildi.
Maglumaty şekillendirmek tehnologiýalary babatynda soňky işläp taýýarlamalaryň görkezilmegine bagyşlanan ýöriteleşdirilen halkara (SID) sergide TCL CSOT hytaý kompaniýasy dünýäde ilkinji eplenýän OLED-telewizoryny görkezdi. Bu barada ITHome portaly habar berýär.
Türkmenistanyň we Özbegistanyň gümrük gulluklarynyň bilermenleri daşary söwda statistikasynyň maglumatlarynyň emele gelişini, şeýle hem bu babatda hyzmatdaşlyk etmegiň mundan beýläkki mehanizmlerini ara alyp maslahatlaşdylar – diýip, Türkmenistanyň Döwlet gümrük gullugynyň saýty habar berýär.
Ýurduň baş prokurorynyň orunbasary Begenç Gurbangulyýewiň baştutanlygyndaky Türkmenistanyň wekiliýeti BMG-niň jenaýatçylygyň öňüni almak we jenaýat adalaty boýunça komissiýasynyň (CCPCJ) Wenada geçýän 32-nji sessiýasyna gatnaşýar.
Türkmenistanyň Inžener-tehniki we ulag kommunikasiýalary instituty suratlandyryjy geometriýa we grafika boýunça Birinji halkara internet-olimpiadasynyň jemlerini jemlediler, onda türkmen talyplary 8 sany altyn medal gazandylar.
USAID-iň telekeçiligi we işewürlik-gurşawy ösdürmek taslamasy bilen hyzmatdaşlykda Plug and Play innowasion platformada Türkmenistandan, Gazagystandan, Gyrgyzystandan, Täjigistandan we Özbegistandan bolan gatnaşyjylar üçin FoundHER maksatnamasyna badalga berildi.
Russiýanyň Türkmenistandaky täze ilçisi Iwan Wolynkin Prezident Serdar Berdimuhamedowa ynanç hatyny gowşurdy. Ilçi bilen söhbetdeşligiň barşynda Prezident iki ýurduň arasyndaky ikitaraplaýyn gatnaşyklarda oňyn ösüşi belledi – diýip, TDH habar berýär.
Prezident Serdar Berdimuhamedow Beýik Britaniýanyň Türkmenistandaky täze ilçisi Stiwen Konlondan ynanç hatyny kabul etdi, şeýle hem onuň bilen türkmen-britan hyzmatdaşlygynyň geljegini ara alyp maslahatlaşdy - diýip, döwlet habarlar agentligi habar berýär.
