Birleşen Arap Emirlikleriniň Dubaý şäheriniň myhmanhanalary durnukly syýahatçylygy ösdürmekde eden tagallalary üçin altyn, kümüş we bürünç markalar bilen belgilener. “Dubaýyň durnukly syýahatçylyk markalary” durnukly ösüş maksatlaryny durmuşa geçirmekde, energiýany we beýleki tebigy serişdeleri tygşytly ulanmakda we kömürturşy bitaraplygyny gazanmakda myhmanhanalaryň edýän tagallalaryny görkezmekde ähmiýetli bolar.
Türkmenistanyň Azerbaýjandaky ilçisi Gurbanmämet Elýasow respublikadaky kiçi we orta biznes Agentliginiň müdiriýetiniň başlygy Orhan Mamedow bilen iki döwletiň işewür toparlarynyň arasyndaky hyzmatdaşlygy giňeltmegiň gelejegini ara alyp maslahatlaşdy – diýip, Azertaž habar berýär.
Türkmenistanyň Singapurdaky täze ilçisi Begenç Durdyýew respublikanyň prezidenti Halima Ýakob bilen iki döwletiň arasyndaky hyzmatdaşlygy ara alyp maslahatlaşdy. Bu barada Koreýa Respublikasyndaky türkmen diplomatiki wekilhaansy habar berýär.
Türkiýede her ýylda geçirilýän aerokosmiki we tehnologiki innowasiýalaryň dünýä festiwaly Teknofest startaplaryň bäsleşigine gatnaşmak üçin ýüz tutmalaryň möhletiniň uzaldylýandygyny yglan etdi. Indi ýüz tutmalar 2023-nji ýylyň 31-nji iýulyna çenli kabul edilýär. Bu barada ORIENT-e Türkiýäniň Aşgabatdaky ilçihanasynyň medeniýet we syýahatçylyk Bölüminde habar berdiler. Möhletiň uzaldylmagy dürli ýurtlardan işläp düzüjileriň topary tarapyndan bäsleşige uly gyzyklanma bildirilmegi bilen baglanyşyklydyr.
Parižiň şäher häkimiýeti 100 ýyllyk arakesmeden soň Senada suwa düşmäge rugsat bermegi göz öňünde tutýar. Fransuz paýtagtynyň meri Ann Idalgo 2025-nji ýylda şäherde Senada suwa düşmek üçin üç zolagyň açyljakdygyny tassyklady. Derýada arassalaýyş işleri tamamlanandan soň, şäher derýasynda ýüzüş 2024-nji ýylyň Olimpiýa oýunlarynyň esasy üstünliklerinden biri bolar. “Le Parisien” gazetiniň berýän habaryna görä, Oýunlaryň maksatnamasyna laýyklykda, paýtagt derýasynda olimpiýa we paralimpiýa ýaryşlarynyň üçüsini - triatlon, marafon ýüzüşi we paratriatlon geçirmek meýilleşdirilýär.
Türkmenistandaky USAID-iň «Merkezi Aziýada Howpsuzlyk Maksatnamasy» BMG-nyň Neşelere we jenaýata garşy göreş bölümi we Türkmenistanyň Zenanlar birleşigi bilen bilelikde Aşgabatda ýaş türkmen maşgalalary üçin sagdyn maşgala gatnaşyklaryny ösdürmek, neşe serişdeleriniň ulanylmagynyň öňüni almak, sagdyn gatnaşyklary ösdürmek we adam söwdasynyň töwekgelçiliginiň öňüni almak boýunça iki günlük okuw gurady.
1-nji awgustdan “Türkmenpoçta” poçta aragatnaşyk kärhanasy özüniň ähli nokatlarynda “Älem TV” hemra teleýaýlymynyň kartlaryny satyp başlar. “Älem TV” operatory Ýewropanyň, Aziýanyň, Russiýanyň, Türkiýäniň, Özbegistanyň we Hindistanyň 230-dan gowrak teleýaýlymyny hemra aragatnaşygy arkaly görkezýär. Hemra aragatnaşygy arkaly teleýaýlymy bökdençsiz we ýokary hilli görmek isleýänler öňümizdäki aýdan operatoryň degişli kartlaryny “Türkmenpoçtanyň” ähli nokatlaryndan satyn alyp bilerler.
Türkmenistanyň bilim ministri Gurbangül Ataýewanyň ýolbaşçylygyndaky wekiliýet ÝUNESKO-nyň Bilimde maglumat tehnologiýalary institunyň direktory Tao Çžan bilen bilimi dolandyrmak boýunça maglumat ulgamyny döretmek meselelerini ara alyp maslahatlaşdylar. Bu barada Türkmenistanyň Fransiýa Respublikasyndaky ilçihanasy habar berýär.
Ýakynlaşyp gelýän okuw ýylyny Lebap welaýatynyň mekdep okuwçylarynyň 5 müňe golaýy täze bilim ojaklarynda garşylar. Has dogrusy täze okuw ýylynyň ilkinji gününde sebitde umumybilim berýän orta mekdepleriň 8-si we 1 sany çagalar bagy açylyp ulanmaga berler. Bu barada Türkmenistanyň resmi metbugaty habar berýär.
QAZAQ AIR awiakompaniýasynyň uçary taryhy uçuş etdi: De-Gawilland Dash 8- Q400 uçarynyň ekipažy tutuşlygyna aýallardan ybaratdy diýip, Almaty.tv awiakompaniýanyň metbugat gullugyna salgylanýar. Serkerde Ýekaterina Swerçkowanyň we ikinji uçarman Ažar Nesipbaýewanyň gözegçiliginde howa gämisi Astana - Petropawlowsk - Astana we Astana - Omsk - Astana ugurlarynda iki uçuş amala aşyrdy. Tutuş ekipaž aýaldan – uçaryň serkerdesi, ikinji uçarman we 2 bortprowodnikden ybaratdy.
Duşenbe güni türki döwletleriň ilkinji bilelikdäki metbugat platformasy bolan Turkic.World (Türk dünýäsi) taslama ofisiniň açylyş dabarasy boldy. Platforma eýýäm «Kazinform» habarlar agentligi, Özbegistanyň milli habarlar agentligi «UzA», Gyrgyzystanyň milli habarlar agentligi «Kabar» we Türkmenistanyň Daşary işler ministrligi goşuldy diýip, AZERTAC habar berýär.
Täjigistanda ýurtda migrantlary hünärmen derejesinde taýýarlamak boýunça taslama ýola goýulýar. Esasy üns hünärmenleriň dil bilimine gönükdiriler, sebäbi respublikanyň raýatlarynyň daşary ýurtlarda işe ýerleşmeginde esasy päsgelçilik olaryň daşary ýurt dillerini bilmezligidir. Ulular üçin bilim merkezlerinde iňlis, koreý we ýapon dili kurslaryny açmak meýilleşdirilýär – diýip, Sputnik habar berýär.
Berkarar SDAM Samsonite dükany ähli çemodanlara 30% we ähli torbalara 40% arzanladyş yglan edýär. Ýokary hilli harytlary satyn almak üçin amatly pursady elden bermäň.
Dürli miweleriň onlarça tonnasy Gazagystana ugradyldy. Bu önümler Türkmenistanyň Senagatçylar we telekeçiler birleşiginiň agzasy bolan “Miwe” açyk paýdarlar jemgyýeti tarapyndan eksport edilýär. Kompaniýanyň düzümine hersi anyk bir miwäni ösdürip ýetişdirýän "Hemsaýa", "Datly miwe", "Miweli atyz", "Gök bulut" ýaly hojalyk jemgyýetleriniň birnäçesi girýär.
Ahal welaýatynyň Ak bugdaý etrabyndan türkmen telekeçisi Batyr Röwşenow Birleşen Arap Emirliklerine ýer tudanasynyň eksportyny ýola goýdy. «Albion» görnüşiniň ilkinji iýmişleri eýýäm Dubaý şäherine geldi – diýip, «Rysgal» gazeti ýazýar.
