Sişenbe güni Hytaýyň Daşary işler ministri Wan I Pekinde "Hytay we Türkmenistan öz dostlukly däplerini dowam etdirmeli, birek-biregi berk goldamaly hem-de özara bähbitli hyzmatdaşlygy çuňlaşdyrmaly" diýip, belledi.

Wan I Hytaýa sapary wagtynda türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň ýanyndaky wekiliýetiň düzüminde bolan Türkmenistanyň Ministrler Kabinetiniň Başlygynyň orunbasary, Daşary işler ministri Raşid Meredow bilen duşuşdy.

Hytaýyň Kommunistik partiýasynyň Merkezi Komitetiniň Syýasy býurosynyň agzasy Wan I türkmen halkynyň Milli Lideri, Gurbanguly Berdimuhamedowyň hytaý halkynyň öňden gelýän dostudygyny belledi. Iki ýurduň ýokary ýolbaşçylarynyň arasyndaky berk özara ynam we çuňňur dostluk gatnaşyklary iki döwletiň arasyndaky hemmetaraplaýyn strategik hyzmatdaşlygyň durnukly ösmegi üçin möhüm strategik ugry üpjün edýär diýip, Wan I aýtdy we taraplary döwlet Baştutanlary tarapyndan bellenilen dogry ýol bilen hytaý-türkmen gatnaşyklaryny yzygiderli öňe sürmäge çagyrdy.

Meredow Hytaýyň "Iki sessiýasynyň" şowly geçirilmegi bilen gutlady. Ol Türkmenistanyň Hytaý tarapyndan öňe sürlen dört sany ählumumy başlangyjy goldaýandygyny we "Hytaý – Merkezi Aziýa" üçünji sammitine bilelikde taýýarlyk görmekde hytaý tarapy bilen hyzmatdaşlyga taýýardygyny mälim etdi.

Taraplar şeýle hem özara gyzyklanma bildirilýän beýleki halkara we sebit meseleleri boýunça pikir alyşdylar.