Hytaý 15-nji Bäşýyllyk maksatnama döwrüne ynam bilen gadam basýar, geljekki bäş ýylda Hytaý – Germaniýa ykdysady we söwda hyzmatdaşlygy üçin täze mümkinçilikler açylar. Bu barada Hytaýyň Döwlet geňeşiniň Premýeri Li Sian hepdäniň çarşenbe güni Germaniýanyň Kansleri Fridrih Merz bilen Pekinde geçiren duşuşygynyň dowamynda aýtdy.

Premýer Li Sian hökümetara geňeşmeleriniň çäklerinde Germaniýa bilen hyzmatdaşlygy ösdürmäge, ösüş strategiýalaryny utgaşdyrmaga, syýasy gatnaşyklary pugtalandyrmaga hem-de söwda gatnaşyklaryny giňeltmäge taýýardygyny mälim etdi.

Premýer Li Sian awtomobil senagaty we himiýa ugurlarynda hyzmatdaşlygy işjeňleşdirmäge, emeli intellekt we biomedisina ýaly täze pudaklary giňeltmäge hem-de ösüşe itergi beriji täze güýçleri döretmäge çagyrdy. Hytaý Germaniýanyň ýokary hilli önümleriniň import möçberini artdyrar we Hytaý kompaniýalarynyň Germaniýanyň ykdysadyýetine maýa goýumlaryny goldar. Premýer Li Sian şeýle hem Germaniýanyň adalatly, durnukly we öňünden çaklap bilinjek işewürlik gurşawyny saklamagyna umyt bildirdi.

Kansler Fridrih Merz Germaniýanyň ýokary derejeli alyş-çalyşlara itergi bermäge, yzygiderli dialogy saklamaga, iki ýurduň ykdysady we söwda hyzmatdaşlygynyň deňagramly hem-de durnukly ösüşini üpjün etmäge taýýardygyny aýtdy. Şeýle hem ol ekologiýa taýdan arassa özgertmeler we howanyň üýtgemegine garşy göreş babatda hyzmatdaşlygy ösdürmegiň möhümdigini nygtady.

Germaniýa Hytaý bilen aragatnaşygy we hyzmatdaşlygy güýçlendirip, köp taraplaýynlygy we erkin söwdany bilelikde goldamaga hem-de Ýewropa Bileleşigi – Hytaý gatnaşyklarynyň mundan beýläk hem ösdürilmegine oňyn goşant goşmaga taýyardyr diýip, Kansler Fridrih Merz belledi.

Gepleşiklerden soň taraplar ekologiýa taýdan arassa geçiş, gümrük, sport we metbugat ugurlarynda hyzmatdaşlyk resminamalarynyň gol çekilişine şaýat boldular.

Kansler Fridrih Merz hepdäniň çarşenbe güni irden Pekine resmi sapar bilen geldi. Bu onuň öz wezipesine girişeninden soň Hytaýa ilkinji saparydyr.