Biziň yhlasymyz – adamlary ýakynlaşdyrmak
Habarlar
Makalalar
Media
Anons
Tehnologiýalar
Biz barada
Habarlaşmak üçin
||
Türkmenistanyň Prezidenti Serdar Berdimuhamedowyň Gazagystan Respublikasyna döwlet sapary diňe bir strategik hyzmatdaşlygy tassyklanmak bilen çäklenmän, eýsem sebitleýin kooperasiýanyň ösüşiniň täze ugurlaryny kesgitleýän birnäçe başlangyçlaryň öňe sürülmegi bilen hem tapawutlandy. Astanada geçirilen ýokary derejeli gepleşikleriň dowamynda Prezident Serdar Berdimuhamedow köpugurly özara baglanyşygy pugtalandyrmaga gönükdirilen esasy ileri tutulýan ugurlar baradaky garaýşyny beýan etdi.
Türkmenistanyň Prezidenti Merkezi Aziýa döwletleriniň Baştutanlarynyň konsultatiw duşuşyklarynyň, “Merkezi Aziýa +” formatlarynyň çäklerinde hyzmatdaşlygy has-da pugtalandyrmaga taýýardygyny tassyklady. Bu Azerbaýjan Respublikasynyň Merkezi Aziýa döwletleriniň Baştutanlarynyň konsultatiw duşuşyklaryna doly hukukly agza hökmünde goşulmagyna degişlidir. Aşgabadyň pikirine görä, bu ädim sebit formatynyň ornuny pugtalandyrmagy we Merkezi Aziýa bilen Günorta Kawkazyň arasyndaky özara baglanyşygyny ýokarlandyrmagy maksat edinýär.
Prezident Serdar Berdimuhamedowyň nygtaýşy ýaly, ekoulgamynda senagat galyndylaryny gaýtadan işlemek taslamalarynda, “ýaşyl” gurluşyk, Aral we Hazar deňizleriniň ekoulgamyny goramak ýaly ugurlarda hyzmatdaşlygy pugtalandyrmak möhümdir.
Türkmenistanyň Baştutany söwda dolanyşygynyň durnukly oňyn ösüşini belläp, energetika ulgamynda hyzmatdaşlyga (şol sanda önümçiligiň netijeliligini we ekologiýa howpsuzlygyny ýokarlandyrmakda tejribe alyşmaga) taýýardygyny tassyklady. Şunuň bilen baglylykda senagat diwersifikasiýasyna üns çekildi.
Himiýa we nebithimiýa senagaty; elektroenergetika we tebigy gazy gaýtadan işlemek; metallurgiýa, maşyngurluşyk we dokma senagaty; şäher gurluşygy (“ýaşyl gurluşyk”, Arkadag şäheri) ýaly strategik taýdan möhüm we ylmy barlaglary talap edýän pudaklarda hyzmatdaşlygy giňeltmegiň möhümligi nygtaldy.
Türkmenistanyň Prezidentiniň beýanatynda ileri tutulýan ugur aýdyň kesgitlenýär: ýokary tehnologiýaly senagat kooperasiýasyna we ýokary goşulan baha geçmek.
Ulag we logistika strategik ugurlar hökmünde tassyklanyldy. Häzirki emele gelen geosyýasy we geoykdysady şertlerde, Gündogar — Günbatar, Demirgazyk — Günorta ugurlary boýunça hereket edýän üstaşyr ulag geçelgelerini işjeňleşdirmek wezipesi aýratyn möhüm ähmiýete eýe bolýar.
Türkmenistanyň Prezidenti ýurdumyzyň diňe bir logistika maksatlaryny yglan etmek bilen çäklenmän, eýsem olary öz tagallalary bilen durmuşa geçirýändigini, sebitleýin ulag gatnawlaryna hyzmat etmek üçin fiziki infrastruktura döredýändigini belledi. Şunuň bilen baglylykda bu anyk ädimleri öz içine alýar: şu aýyň başynda Garabogazköl aýlagynyň üstünden geçýän awtomobil köprüsi işe girizildi; Türkmenbaşy şäherinden türkmen-gazak döwlet serhedine çenli ýokary hilli awtomobil ýolunyň gurluşygy dowam edýär.
Arkadag şäheri (“akylly şäher” konsepsiýasy) ýaly anyk taslamalara esaslanyp, IT ösüşi we sanlylaşdyrma Türkmenistan üçin strategik ileri tutulýan ugurlar hökmünde kesgitlenildi. Bu hyzmatdaşlygyň eýýäm döredilen milli hukuk we tehnologik binýadynyň esasynda amala aşyrylýandygyny nygtaýar.
Aral we Hazar deňizleriniň ekoulgamlaryny goramak, şeýle hem “ýaşyl” gurluşyk we galyndylary gaýtadan işlemek taslamalary boýunça hyzmatdaşlygy pugtalandyrylmagynyň möhümdigi nygtalýar.
Ikitaraplaýyn we sebitleýin gün tertibindäki möhüm meseleleriň arasynda suw serişdelerini rejeli ulanmak meselesi agzaldy.
Türkmenistanyň Baştutany Astana saparynyň çäklerinde “Alem.AI” halkara emeli aň merkezine baryp gördi.
Mundan başga-da, saparyň dowamynda pudaklaýyn edaralaryň derejesinde geçirilen duşuşyklarynda şu resminamalara gol çekildi:
— Türkmen döwlet bedenterbiýe we sport instituty bilen “Gazak sport we syýahatçylyk akademiýasy” milli paýdarlar jemgyýetiniň arasynda hyzmatdaşlyk hakynda Ähtnama;
— Türkmen döwlet medeniýet instituty bilen “Halkara syýahatçylyk we myhmansöýerlik uniwersiteti” täjirçilik däl paýdarlar jemgyýetiniň arasynda hyzmatdaşlyk etmek hakynda Ähtnama;
— Türkmenistanyň Döwlet medeniýet merkeziniň Döwlet muzeýi bilen Gazagystan Respublikasynyň Medeniýet we maglumat ministrliginiň Medeniýet komitetiniň Gazagystan Respublikasynyň Milli muzeýiniň arasynda hyzmatdaşlyk etmek hakynda Ähtnama;
— “Türkmentelekom” elektrik aragatnaşyk kompaniýasy bilen “TNS-Plus” jogapkärçiligi çäklendirilen şereketiň arasynda Türkmenistan — Gazagystan Respublikasynyň serhet geçelgelerinde optiki-süýümli aragatnaşyk kabelini gurnamak we magistral torlary birikdirmek meýilleri hakynda Ähtnama.
ORIENT
