Biziň yhlasymyz – adamlary ýakynlaşdyrmak
Habarlar
Makalalar
Media
Anons
Tehnologiýalar
Biz barada
Habarlaşmak üçin
||
Astrahan şäherinde Astrahan oblastynyň Daşary aragatnaşyklar ministri Wladimir Golowkow bilen Türkmenistanyň Astrahandaky konsuly Gadam Ilamanowyň arasynda duşuşyk geçirildi. Taraplar söwda-ykdysady hyzmatdaşlygy mundan beýläk-de berkitmegiň mümkinçiliklerini, şeýle hem bilim we ýaşlar syýasaty babatynda özara gatnaşyklaryň meselelerini ara alyp maslahatlaşdylar.
Wladimir Golowkowyň belleýşi ýaly, şu ýyl Astrahandan Türkmenistana doňdurylan we guradylan balygyň iberilişi gaýtadan ýola goýuldy, geçen ýyl wagtlaýyn togtadylan bu ugur indi dowam etdirilýär. Mundan başga-da, Türkmenistana bugdaý ununyň eksporty dowam edýär — 2025-nji ýylyň üç çärýeginiň netijeleri boýunça 3 müň tonnadan gowrak önüm ugradyldy.
Duşuşykda ynsanperwer gatnaşyklar aýratyn üns merkezinde boldy. Häzirki wagtda Astrahan oblastynyň okuw edaralarynda 3649 türkmenistanly talyp bilim alýar, bu bolsa geçen okuw ýyly bilen deňeşdirilende 30% köpdür. Bilim maksatnamalary inženerçilik, deňizçilik işi we mugallymçylyk ýaly giň ugurlary öz içine alýar.
Türkmenistanyň Astrahandaky konsuly Gadam Ilamanow sebitiň ýokary okuw mekdepleriniň halkara başlangyçlaryna işjeň gatnaşýandygyny belläp geçdi. Ol general-admiral F.M. Apraksin adyndaky Hazar deňiz we derýa ulaglary institutynyň binýadynda geçirilen «BMG-niň nusgasy: Parahatçylyk, howpsuzlyk we durnukly ösüş bähbidine Bitaraplygyň dostlar topary» atly maslahatynyň üstünlikli geçirilendigini nygtady.
Mundan başga-da, gepleşikleriň dowamynda 26–28-nji noýabr aralygynda geçiriljek «Demirgazyk — Günorta halkara ulag geçelgesi: Täze mümkinçilikler» atly III Astrahan halkara forumyna taýýarlyk meselesi ara alnyp maslahatlaşyldy. Foruma Türkmenistanyň wekiliýetiniň gatnaşmagy hem meýilleşdirilýär. Bu forumyň maksady ykdysady gatnaşyklary giňeltmek, ulag-logistika mümkinçiliklerini ösdürmek we Hazar sebitindäki döwletleriň arasynda özara bähbitli hyzmatdaşlygy pugtalandyrmakdyr.
Taraplar uzak ýyllaryň dowamynda Türkmenistan bilen Russiýa Federasiýasynyň Astrahan oblastynyň arasynda emele gelen dostlukly gatnaşyklaryna we özara ynanyşmaga esaslanýan hyzmatdaşlygy mundan beýläk-de ösdürmäge taýýardyklaryny tassykladylar.
