Türkmenistanyň hemişelik bitaraplygynyň 30 ýyllyk baýramçylygy mynasybetli ýurdumyzyň ähli teatrlarynyň sahnalarynda «Hemişelik bitaraplyk – dost-doganlygyň binýady» atly Teatr hepdeligi geçiriler. Bu giň gerimli medeni çärä görülýän taýýarlyk barada 17-nji oktýabrda geçirilen Hökümet mejlisinde Ministrler Kabinetiniň Başlygynyň orunbasary Bahar Seýidowa hasabat berdi.

Teatr hepdeligi tomaşaçylara ajaýyp medeni sowgat bolar. Onda ýörite bu baýramçylyk senesine bagyşlanyp taýýarlanan täze sahna oýunlarynyň ilkinji görkezilişleri — premýeralar giň meýilnama boýunça guralar.

Täze sahna eserlerinden başga-da, hepdelik maksatnamasyna dünýä nusgawy ýazyjylarynyň eserleri esasynda goýlan teatr oýunlary hem giriziler.

Ýurdumyzyň teatrlarynda geçiriljek bu Hepdelik hemişelik bitaraplygyň dostluk, doganlyk we dialog ýaly ýörelgeleriniň Türkmenistanyň medeni we sahna sungatynyň giňişliginde öz beýanyny tapýandygyny görkezýär.

ORIENT