Özbegistanyň Termez şäherinde Merkezi we Günorta Aziýanyň özara baglanyşygy ara alnyp maslahatlaşylýar
18.05.2025 | 14:25 |
Aşgabat, 18-nji maý | ORIENT. Merkezi we Günorta Aziýanyň arasyndaky baglanyşyk boýunça Termez dialogynyň birinji duşuşygy: “Parahatçylygyň, dostlugyň we abadançylygyň umumy giňişligini gurmak” atly temasy 2025-nji ýylyň 19-21-nji maý aralygynda Termezde geçiriler.
Dialog syýasy, ykdysady we işewür toparlaryň, maliýe guramalarynyň, halkara we sebit guramalarynyň 200-e golaý wekili, şeýle hem dünýäniň seljeriş we ylmy-barlag merkezleriniň görnükli bilermenlerini bir ýere jemlär. Bu foruma gatnaşyjylar Merkezi we Günorta Aziýa, Ýewropa, GDA, Aziýa — Ýuwaş umman sebitiniň, Amerika we Ýakyn Gündogar ýurtlaryndan gelerler. Bu bolsa temanyň giň gerimini we ähmiýetini nygtaýar.
Bu möhüm halkara forumyna Türkmenistandan wekiliýet gatnaşar. Wekiliýetiň düzüminde ORIENT web sahypasynyň baş redaktory Bekdurdy Amansaryýew hem bar. Ol beýleki watandaş hünärmenleri bilen birlikde sebitleýin özara baglanyşyk meseleleri boýunça bilermenlik dialogyna çagyryldy.
Termez dialogynyň esasy maksady — BMG-niň Baş Assambleýasynyň ýörite “Merkezi we Günorta Aziýanyň arasyndaky özara baglanyşygy pugtalandyrmak” atly kararnamasyny iş ýüzünde ilerletmek üçin köpugurly pikir alyşma meýdançasyny döretmekden ybaratdyr. Bu kararnama 2022-nji ýylda Özbegistan Respublikasynyň Prezidenti Şawkat Mirziýoýewiň başlangyjy bilen kabul edildi we bu ýagdaý Dialoga ýokary halkara derejesini berýär.
Forumyň gatnaşyjylary Merkezi we Günorta Aziýanyň arasynda sebitara hyzmatdaşlygyň häzirki ýagdaýyny we geljekki mümkinçiliklerini jikme-jik ara alyp maslahatlaşarlar. Üns merkezinde howpsuzlygy, durnuklylygy we durnukly ösüşi üpjün etmekde hyzmatdaşlygy pugtalandyrmak meseleleri, şeýle hem bu özara baglanyşygyň çäklerinde ykdysady ösüşi üpjün etmäge hususy pudak bilen maliýe düzümleriniň goşandyny giňeltmek meselesi bolar.
Dialogyň netijesinde Merkezi we Günorta Aziýanyň arasynda ynanyşmagy we hyzmatdaşlygy berkitmek ugrunda tagallalary birleşdirmäge çagyrýan resminamanyň kabul edilmegine garaşylýar.
Termez dialogy sebitara özara baglanyşygy ösdürmegiň geljegini kesgitlemek hem-de giň Ýewraziýa yklymynda parahatçylygy, howpsuzlygy we durnuklylygy üpjün etmek üçin yzygiderli meýdança bolmaga gönükdirilendir. Türkmenistandan wekilleriň, şol sanda bilermenleriň bu Dialoga gatnaşmagy ýurduň giň gerimli sebitleýin hyzmatdaşlygy ösdürmäge ygrarlydygyny nygtaýar.
Çäräniň guramaçylary hökmünde Özbegistan Respublikasynyň Prezidentiniň ýanyndaky Strategik we sebitleýin barlaglar instituty, Daşary işler ministrligi hem-de Özbegistan Respublikasynyň Söwda-senagat edarasy çykyş edýär.
