“Türkmenaragatnaşyk” emeli aňyň we kiber howpsuzlygyň ösüşi babatda halkara hyzmatdaşlygy maksat edinýär
30.04.2025 | 17:30 |
Türkmenistan esasy pudaklara emeli aň tehnologiýalarynyň ornaşdyrylmagyna işjeň ugur aldy. “Türkmenaragatnaşyk” agentliginiň başlygynyň orunbasary Nurmyrat Rejepow ýurduň dolandyryş, saglygy goraýyş, bilim we oba hojalyk ulgamlarynyň netijeliligini ýokarlandyrmak üçin emeli aňy ulanmagy maksat edinýändigi barada habar berdi.
Aşgabatda geçen Standartlaşdyrma boýunça halkara maslahatynda N.Rejepow dünýä tejribesini nazar almak bilen, döwletiň emeli aňy okuw prosesine ornaşdyrmak üçin zerur bolan kanunlary we strategiýalary işläp taýýarlaýandygy barada belledi.
“Türkmenaragatnaşyk” agentligi 5G ulgamy, älem boýunça ylmy-barlaglary, kiber howpsuzlyk, maglumatlary işlemek merkeziniň döredilmegi hem-de sanly tehnologiýalar we emeli aň babatda hünärmenleriň taýýarlanylmagy ýaly ugurlarda halkara hyzmatdaşlyga taýýardygyny beýan etdi.
Türkmenistanda kiberhowpsuzlyga aýratyn üns berilýär. Bu sebäpli Döwlet kiber howpsuzlyk gullugy hem döredildi. Şeýle hem, ýaş IT-hünärmenlere goldaw berilýär, pudaklaýyn ýokary okuw mekdepler döwrebaplaşdyrylýar hem-de IT-startaplar üçin şertler döredilýär.
N.Rejepow sanly ykdysadyýet üçin programma üpjünçiliginiň köp böleginiň türkmen programmistleri tarapyndan işläp taýýarlanylýandygyny aýtdy. Sanly infrastrukturany ösdürmek, ylmyň we önümçiligiň aragatnaşygyny berkitmek hem-de halkara bazara çykmak üçin hususy pudakda IT-klasterler kemala gelýär hem-de IT-parklar açylýar.
Nurmyrat Rejepow sanly tehnologiýalar babatda tejribe alyşmak hem-de bu ugurdaky halkara hyzmatdaşlygy ýola goýmak maksady bilen halkara hyzmatdaşlary Aşgabatdaky “Türkmentel 2025” sergisine we maslahatyna gatnaşmaga çagyrdy.
ORIENT news
