Anna güni, 17-nji martda Türkmenistanyň Döwlet haryt-çig mal biržasynda jemi bahasy $126,7 mln amerikan dollaryna deň bolan 11 geleşik baglaşyldy – diýip, ORIENT-iň habarçysy habar berýär.
Türkmenistanyň daşary ýurtlardaky ilçihanalary türkmenistanlylary Mejlisiň deputatlarynyň ýedinji çagyrylyşynyň saýlawlaryna ses bermäge çagyrýarlar. Dünýäniň onlarça şäherlerindäki ýurduň diplomatik missiýalary saýlaw uçastoklarynyň açylandygyny sosial torlardaky sahypalarнтda habar berdiler.
18-nji martda paýtagtymyzdaky «Aşgabat» kinoteatrynda režissýor Isgendermuhammet Annamuhammedowyň «Ýaşlar» filminiň ilkinji görkezilişi bolar, film Öre Daşgynowyň ady bir eseriniň esasynda surata düşürildi.
Türkmenistanyň ýetginjekler ýygyndysy Ulan-Batorda (Mongoliýa) tamamlanan Aziýanyň we Okeaniýanyň Çempionatynda kümüş medallary gazandy.
Türkmenistan 2023-nji ýylyň ýanwar-fewral aýlarynda Azerbaýjana $89,5 mln möçberdäki harydy eksport etdi, bu bolsa geçen ýylyň görkezijisinden 4 esse ýokarydyr – diýip, Trend portaly habar berýär.
Türkmenistanyň tanymal sungat ussatlary Türkmenistanyň Suratkeşler birleşiginiň Bäşim Nuraly adyndaky baýragy bilen sylaglandy. Baýraklar anna güni Aşgabatda birleşigiň Sergi merkezinde Nowruz baýramyna bagyşlanyp geçirilen serginiň açylyş dabarasynda gowşurylyp, oňa Türkmenistanyň sungatda at gazanan işgäri Allamyrat Muhammedow, Türkmenistanyň halk suratkeşi Amandurdy Meredow, Türkmenistanyň halk suratkeşi Gylyçmyrat Ýarmämmedow, Türkmenistanyň halk suratkeşi Dursunsolmaz Muhammedowa mynasyp boldular.
Türkiýäniň prezidentiniň Administrasiýasynyň aragatnaşyklar müdirligi «Asyryň betbagtçylygy: 2023-nji ýylyň 6-njy fewralyndaky Kahramanmaraşdaky ýer titremeleri» atly kitaby neşire taýýarlady – diýip, Anadolu agentligi habar berýär.
Şu gün Türkmenistanda däp boýunça ýylda iki gezek – baharda we güýzde geçirilýän giň gerimli bag oturtmak kampaniýasy başlandy. Agaç nahallaryny oturtmak çäresine dürli edardyr guramalaryň işgärleri we talyp ýaşlar gatnaşýarlar.
Türkmen wekiliýeti Türkmenistanyň Daşary işler ministriniň orunbasary Wepa Hajyýewiň baştutanlygynda Yslam hyzmatdaşlyk guramasynyň agza-döwletleriniň parahatçylygy, howpsuzlygy we durnukly ösüşi pugtalandyrmagyň meselelerini ara alyp maslahatlaşdy – diýip, ýurduň daşary syýasat edarasy habar berýär.
Aziýanyň Olimpiýa geňeşiniň türgenleriniň iki günlük forumy başlandy, ol kyrkdan gowrak Milli olimpiýa komitetleriniň wekillerini ýygnar.
ŞHG-na agza-döwletleriň energetika ministrleri ýangyjyň täze görnüşleri we energetika pudagynda modelirleme boýunça hyzmatdaşlyk barada Bilelikdäki beýannamany kabul etdiler. Bu barada guramanyň resmi saýty habar berýär.
Türkmenistanda parlamentiň deputatlarynyň saýlawlaryna taýýarlygy we onuň geçirlişini monitoring etmegiň çäklerinde GDA-dan gelen synçylaryň missiýasy Türkmenistanyň Ýokary kazyýetiniň, Baş prokuraturasynyň we IIM-niň wekilleri bilen duşuşyklary geçirdi. Bu barada Arkalaşygyň metbugat gullugy habar berýär.
«Demirýollary» açyk görnüşli paýdarlar jemgyýeti demir ýollaryň geçelgesini elektrikleşdirmegi meýilleşdirýär, munuň üçin duýduryş, aragatnaşyk we elektrik üpjünçiligi üçin maddy-tehniki serişdeler satyn alnar.
GDA-nyň ähli ýurtlary şu ýylyň awgustynda Belarusda geçjek Arkalaşygyň ýurtlarynyň II Oýunlaryna güýçli toparlary çykarjakdyklaryny tassykladylar. Bu barada Belarusyň wise-premýeri Igor Petrişenko salgylanyp, BelTA habar berýär.
Türkmenistanyň Katar döwletindäki ilçihanasyny Prezident Serdar Berdimuhamedowyň Doha saparynyň çäklerinde açarlar – diýip, Türkmenistanyň hökümetiniň 17-nji martda bolan mejlisiniň jemleri boýunça TDH bahar berýär.
