Abuali ibni Sino adyndaky Täjigistanyň döwlet lukmançylyk uniwersitetinde Türkmenistanyň Täjigistan Respublikasyndaky Adatdan daşary we Doly ygtyýarly ilçisi bilen uniwersitetiň rektory, lukmançylyk ylymlarynyň doktory, professor Muhiddin Nuriddin Dawlatali bilen duşuşyk geçirildi.

Duşuşygyň dowamynda taraplar döwlet baştutanlarynyň üns-aladasy netijesinde ähli ugurlar boýunça yzygiderli ösdürilýän türkmen-täjik gatnaşyklarynyň ýokary derejesini bellediler. Şeýle hem bilim ulgamyndaky hyzmatdaşlyk, akademiki alyş-çalyşlar we iki ýurduň ýokary okuw mekdepleriniň arasyndaky gatnaşyklar barada aýratyn durlup geçildi.

Taraplar Türkmenistanyň we Täjigistanyň lukmançylyk ugurly ýokary okuw mekdepleriniň arasynda bar bolan hyzmatdaşlyk ylalaşyklarynyň ähmiýetini nygtap, gatnaşyklary mundan beýläk-de giňeltmäge gyzyklanma bildirdiler. Şeýle hem 2010-njy ýylyň 18-nji martynda türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow tarapyndan bu uniwersitete amala aşyrylan saparyň ikitaraplaýyn hyzmatdaşlygyň möhüm sahypasy bolandygy bellenildi. Saparyň dowamynda professor-mugallymlar bilen duşuşyk geçirilip, türkmen halkynyň Milli Lideri Gurbanguly Berdimuhamedowa bu ýokary okuw mekdebiniň Hormatly professory diýen at dakyldy.

Duşuşygyň ahyrynda uniwersitetiň talyplaryna – 2025-nji ýylyň 20-nji noýabrynda Myrat Garryýew adyndaky Türkmenistanyň döwlet lukmançylyk uniwersitetinde geçirilen ýokary okuw mekdepleriniň talyplarynyň arasynda IV Halkara internet biologiýa olimpiadasynyň ýeňijilerine sylag gowşurylyş dabarasy geçirildi.

Olimpiadanyň netijeleri boýunça uniwersitetiň 35 talyby baýrakly orunlara mynasyp boldy, olaryň 12-si medal, 23-si bolsa sertifikat bilen sylaglanyldy.

Duşuşygyň ahyrynda uniwersitetiň rektoryna türkmen halkynyň Milli Lideri Gurbanguly Berdimuhamedowyň täjik dilinde neşir edilen «Türkmenistanyň dermanlyk ösümlikleri» atly kitaby gowşuryldy.