24-nji martda Türkmenistanyň paýtagty Aşgabat şäherindäki Halkara ynsanperwer ylymlary we ösüş uniwersitetiniň (HYYweÖU) diwarlarynda VI Açyk halkara matematika olimpiadasynyň (Open Mathematical Olympiad for University Students – OMOUS-2026) dabaraly açylyşy geçirildi.

Şu ýyl OMOUS-2026 gatnaşyjylaryň giň geografiyasyny görkezýär. Intellektual bäsleşiklerine dünýäniň köp ýurtlaryndan, hususan-da Russiýa Federasiýasyndan, Özbegistan Respublikasyndan, Gresiýadan, Eýran Yslam Respublikasyndan, Germaniýa Federatiw Respublikasyndan, Wengriýadan, Niderlandlar Patyşalygyndan, Täjigistan Respublikasyndan hem-de Birleşen Arap Emirliklerinden toparlar gatnaşýar. Daşary ýurtly myhmanlar bilen birlikde, Türkmenistanyň welaýatlaryndan we paýtagtymyzdaky ýokary okuw mekdepleriniň talyplary hem öz bilimlerini görkezýärler.

Her ýyl geçirilýän bu intellektual forumy Türkmenistanyň we daşary ýurtlaryň öňdebaryjy ýokary okuw mekdeplerine wekilçilik edýän ýüzlerçe zehinli matematik talyplaryny ýene-de bir ýere jemledi. OMOUS olimpiadasy ýyllaryň dowamynda diňe bir zehinleri ýüze çykarmak üçin däl, eýsem halkara akademiki hyzmatdaşlygy berkitmek we ylmy tejribe alyşmak üçin abraýly meýdança öwrüldi.

Çäräniň resmi böleginde daşary ýurt uniwersitetleriniň wekilleri hem-de uniwersitetiň ýolbaşçylary çykyş etdiler. Gutlag çykyşlarynda ylmyň we bilimiň ösdürilmegi, okuw prosesiniň sanlylaşdyrylmagy hem-de zehinli ýaşlaryň goldanylmagy döwlet syýasatynyň ileri tutulýan ugurlarydygy aýratyn nygtaldy. Şeýle hem matematikanyň tehnologiki ösüşiň we milli ykdysadyýetiň innowasion ösüşiniň esasy binýady hökmünde ähmiýetine aýratyn üns berildi.

Olimpiada şahsy we toparlaýyn görnüşde geçirilýär. Bäsleşikleriň maksatnamasy matematiki derňew, algebra, sanlar nazaryýeti we kombinatorika boýunça çylşyrymly meseleleri çözmegi öz içine alýar.

Guramaçylar bu ýyl meseleleriň taýýarlanyşynda öňdebaryjy halkara usulyýetleriň göz öňünde tutulandygyny, şeýle hem netijeleri barlamak üçin häzirki zaman sanly platformalaryň ulanylmagynyň bäsleşigiň iň ýokary derejede açyklygyny we adalatlylygyny üpjün edýändigini bellediler.

Akademiki bölek bilen birlikde, olimpiada gatnaşyjylar üçin baý medeni maksatnama hem taýýarlanyldy. Paýtagtymyza gelen myhmanlar Aşgabat şäheriniň gözel ýerleri bilen tanyşyp, muzeýlere we medeni merkezlere baryp görüp bilerler. Bu bolsa dürli ýurtlaryň ýaşlarynyň arasynda dostlukly gatnaşyklary berkitmäge we Türkmenistanyň baý medeni mirasyny wagyz etmäge ýardam edýär.

Olimpiada birnäçe gün dowam eder we onuň jemleriniň netijesinde dürli ugurlar boýunça ýeňijiler kesgitlener.

ORIENT