||
Koreýa Respublikasy taryhy wakany —«Koreýa – Merkezi Aziýa» birinji sammitini taýýarlamagyň amaly tapgyryna resmi taýdan geçdi. 16-njy martda Seulda, Daşary işler ministrliginiň binasynda, 2026-njy ýylyň sentýabr aýyna meýilleşdirilen ýokary derejeli duşuşygy taýýarlamak boýunça ýörite meýilleşdiriş toparynyň açylyş dabarasy boldy.
Çärä Koreýanyň Daşary işler ministri Ço Hýon, taýýarlyk komitetiniň ýolbaşçylary we sebitiň bäş döwletiniň — Türkmenistanyň, Gazagystanyň, Özbegistanyň, Gyrgyzystanyň hem-de Täjigistanyň ilçihanalarynyň wekilleri gatnaşdylar.
Ministr Ço Hýon prezident Li Çže Mýonyň bu waka aýratyn ähmiýet berýändigini nygtady. Döwlet Baştutanynyň tabşyrygy boýunça Günorta Koreýada eýýäm geljekki forumyň üstünlikli geçmegini üpjün etmek üçin esasy ministrlikleri we edaralary birleşdirýän umumyhökümet hyzmatdaşlyk ulgamy döredildi.
Sammitiň geçiriljek anyk seneleri eýýäm mälim edildi— 2026-njy ýylyň 16-17-nji sentýabry. Daşary işler ministriniň orunbasary Çon Yý Heniň ýolbaşçylygyndaky meýilleşdiriş topary gysga wagtyň içinde gün tertibini ähli gatnaşyjylar bilen utgaşdyrmaly bolar.
Ministr Ço Koreýanyň degişli edaralary bilen Merkezi Aziýa ýurtlarynyň ilçihanalarynyň arasynda işjeň gatnaşykda bolmaga çagyrdy. Ýörite topar diplomatik marafonyň tehniki we guramaçylyk taýdan bökdençliksiz geçmegi üçin iş alyp barar. Sammitiň Koreýanyň «K-Silk Road» strategiýasynyň çäginde uzak möhletleýin tehnologik we maýa goýum hyzmatdaşlygy üçin binýat goýmagyna garaşylýar.
Sebitiň ýurtlarynyň diplomatik wekilhanalarynyň wekilleri Seulyň Merkezi Aziýa bilen ýakynlaşmak ugrundaky ulgamlaýyn tagallalaryny belläp, ýakyndan hyzmatdaşlyga taýýardyklaryny mälim etdiler.
Syýasy taýýarlygyň ÝUNESKO-nyň maddy däl mirasyna bagyşlanan «Nowruz» atly bilelikdäki täsin kitabyň tanyşdyrylyşy bilen gabat gelmegi simwoliki ähmiýete eýedir. Bu dialogyň çäginde 18-nji martda «MA – Koreýa Respublikasy» hyzmatdaşlyk forumynyň Sekretariatynda diplomatlary, alymlary we syýahatçylyk işewürliginiň wekillerini birleşdiren maslahat geçirildi.
Türkmenistan bu meýdançada däp-dessurlary gorap saklamagyň özboluşly nusgasyny hödürledi. Türkmenistanyň Adatdan daşary we Doly ygtyýarly Ilçisi Begenç Durdyýew biziň ýurdumyzda Nowruzyň aýratyn gerim bilen bellenilýändigini, dabaralaryň merkeziniň bolsa hemişe «Nowruz ýaýlasydygyny» nygtady.
2026-njy ýylda Türkmenistan özüniň garaşsyzlygynyň 35 ýyllygyny belleýär. Ilçi myhmanlary «Garaşsyz, baky Bitarap Türkmenistan — bedew batly at-myradyň mekany» ýyly şygary bilen tanyşdyryp, ýurduň ugrunyň dowamatlydygyny nygtady. Foruma gatnaşyjylar Prezident Serdar Berdimuhamedowyň we türkmen halkynyň Milli Lideri Gurbanguly Berdimuhamedowyň kitaplarynyň sergisi, şeýle hem milli mirasyň çuňlugyny açyp görkezýän gymmatlyklar bilen tanyşdylar.
Duşuşygyň ahyrynda türkmen milli tagamlarynyň hödür edilmegi resmi kabul edişligi mähirli, dostlukly duşuşyga öwürdi.
Sentýabr aýyna meýilleşdirilen sammit diňe bir energetika ýa-da IT meseleleri bilen çäklenmez. Medeni miras hyzmatdaşlygyň esasy sütünleriniň biri bolar. Seuldaky tanyşdyrylyş dabarasyna gatnaşyjylarynyň belleýşi ýaly, şu gün Koreýa we Merkezi Aziýa geljegiň ýokary tehnologiýalarynyň köpasyrlyk däp-dessurlar bilen sazlaşykly utgaşýan täze sahypasyny açyp, «bahary bilelikde garşylaýarlar».
© ORIENT, 2026. Maglumatlar göçürilip çap edilende we ulanylanda, çeşmä salgylanmak hökmandyr.
Koreýanyň DIM-i Türkmenistanda täze ilçi belledi
Türkmenistanyň DIM-niň HGI üçin Günorta Koreýadan 4K formatdaky media diplomatiýasy we enjamlar
Hytaýyň Täze ýyly