Özbegistanyň paýtagty 23-24-nji martda «Italiýa — Merkezi Aziýa (C5) + Azerbaýjan» işewürlik-forumynyň çäginde azyk strategiýasynyň ara alnyp maslahatlaşylýan merkezine öwrüldi. Italiýanyň Oba hojalyk ministri Françesko Lollobrijidanyň we sebitiň degişli edaralarynyň ýolbaşçylarynyň gatnaşmagynda geçen iki günlük duşuşyk jemleýji kommunikeniň kabul edilmegi bilen tamamlandy. Bu resminama adaty ekerançylykdan regeneratiw (dikeldiş) oba hojalygy nusgasyna geçilmegini tassyklaýar, bu ýerde innowasiýalar, sanlylaşdyrma we howa çagyryşlaryna uýgunlaşmak esasy orunda durýar.

Ara alyp maslahatlaşmalaryň esasy temasy — suw serişdeleriniň meselesi şertlerinde sebitiň azyk özygtyýarlylygyny üpjün etmäge ukyply durnukly oba hojalyk ekoulgamlary döretmek boldy. Türkmenistandan, Gazagystandan, Gyrgyzystandan, Täjigistandan we Azerbaýjandan gelen foruma gatnaşyjylar italiýaly bilermenler bilen bilelikde ýokary tehnologiýaly taslamalara maýa goýumlary çekmek boýunça ädimleri kesgitlediler. Jemleýji resminamada ýer serişdeleriniň rejeli ulanylmagyna we oba hojalygynda ýitgileri azaltmaga hem-de önümçilik tapgyrlaryny düzgünleşdirmäge mümkinçilik berýän IT-çözgütleriň ornaşdyrylmagyna aýratyn üns berildi.

Forumyň çäklerinde Türkmenistanyň Oba hojalyk ministriniň orunbasary Berkeli Berkeliýew bilen Özbegistanyň Oba hojalyk ministri Ibrohim Abdurahmonowyň arasynda ikitaraplaýyn duşuşyk geçirildi. Goňşy iki döwletiň wekilleriniň arasyndaky dialog iň wajyp we geljegi uly ösüş ugurlary barada boldy. Hususan-da, taraplar gowaça tohumçylygy ulgamynda hyzmatdaşlygy giňeltmek barada ylalaşdylar. Bu ýerde gürrüň diňe bir önüm ibermek barada däl-de, eýsem tohumlaryň görnüşlerini toprak-howa aýratynlyklaryny hasaba alyp, sebitler boýunça ýerleşdirmäge ylmy çemeleşmek, şeýle hem gurakçylyga çydamly we ýokary hasylly ekinleri ornaşdyrmak barada gidýär.

Aşgabat bilen Daşkendiň arasyndaky özara hyzmatdaşlygyň möhüm ugry — daýhanlaryň hünär derejesini ýokarlandyrmak boýunça synag taslamalarynyň amala aşyrylmagy bolar. Häzirki zaman oba hojalyk tehnologiýalaryna we meýdanlary sanly usulda gözegçilik etmegiň usullaryny öwretmek, iki ýurduň hem eksport mümkinçiliklerini artdyrmakda esasy gural hökmünde garalýar. Taraplar sanly ösüşi çaltlandyrmagyň we «akylly» oba hojalygy pudagynda tejribe alyşmagyň oba senagat toplumynda uzak möhletleýin we özara bähbitli hyzmatdaşlygyň binýady boljakdygyny tassykladylar.