Nýu-Deli şäherinde geçirilen “India AI Impact Expo 2026” halkara sergisinde tehnologiýa bilermenleri Hindistan bilen Hytaýyň tehnologiýa we beýleki ugurlarda hyzmatdaşlygynyň giň mümkinçilikleriniň bardygyny bellediler hem-de hyzmatdaşlygyň geljekki ösüşe güýçli itergi berip biljekdigini aýtdylar.

Serginiň çäginde CGTN teleýaýlymyna beren beýanatlarynda bilermenler özara bähbitli hyzmatdaşlygyň ähmiýetine aýratyn ünsi çekdiler. “Microsoft” kompaniýasynyň prezidenti Bred Smit tehnologiýa, ykdysadyýet we beýleki ugurlarda hyzmatdaşlyk üçin uly mümkinçilikleriň bardygyny aýtdy. Onuň sözlerine görä, dünýäde aratapawutlyklar köp bolsa-da, maýa goýum, kapital, hasaplaýyş kuwwaty we innowasiýa mümkinçilikleri çäkli bolup galýar. Şoňa görä-de, taraplaryň bilelikde ösmegi üçin giň mümkinçilikleri bardyr.

Birleşen Milletler Guramasynyň Sebitara Jenaýat we Adalat boýunça Ylmy-barlag institutynyň (UNICRI) Emeli intellekt we robototehnika merkeziniň ýolbaşçysy Irakli Beridze hem emeli intellekt ulgamynda hyzmatdaşlygy güýçlendirmegiň zerurdygyny aýtdy. Ol emeli intellektiň peýdaly ulanylmagy geljekde abadançylygyň möhüm şerti boljakdygyna ynam bildirdi.

Bäş gün dowam edýän “India AI Impact Expo 2026” sergisine 20 sany döwlet ýolbaşçysy, 60 ministr hem-de dünýäniň dürli ýurtlaryndan 500-den gowrak emeli intellekt liderleri gatnaşýar. Bu sergi emeli intellektiň ählumumy täsiri we halkara hyzmatdaşlyk meselelerini ara alyp maslahatlaşmak boýunça möhüm meýdançadyr.