2025-nji ýylda Azerbaýjan bilen Türkmenistanyň arasynda dost-doganlyk we strategik hyzmatdaşlyk gatnaşyklary ep-esli derejede ösdi, özara ynanyşmagy we dostluk ýörelgeleriniň esasynda has-da berkedi we giňedi.

2017-nji ýylda gol çekilen «Strategik hyzmatdaşlyk hakynda Jarnamanyň» ruhuna laýyklykda, iki ýurduň arasynda strategik hyzmatdaşlygyň mundan beýläk-de çuňlaşdyrylmagy we täze ugurlarda özara bähbitli başlangyçlaryň durmuşa geçirilmegi aýratyn ähmiýete eýedir. Bu barada Azerbaýjanyň Türkmenistandaky ilçisi Gismet Gözalow AZERTAJ agentligi bilen söhbetdeşliginde aýtdy.

Ilçi 2025-nji ýylda ýokary derejede geçirilen özara saparlaryň, duşuşyklaryň we çäreleriň ykdysady, energetika, ulag, üstaşyr daşamalary, medeni-ynsanperwer we durmuş ulgamlaryny öz içine alýan ähli ugurlarda hyzmatdaşlygyň mundan beýläk-de giňeldilmegi üçin berk binýat döredendigini belledi. Şu ýylyň iýul aýynda türkmen halkynyň Milli Lideri Gurbanguly Berdimuhamedow Baku we Garabag sebitine baryp gördi, netijede doganlyk halklarymyzyň arasynda strategik hyzmatdaşlygy pugtalandyrmak we dostlugy çuňlaşdyrmak boýunça möhüm ädimler ädildi.

Diplomat saparyň dowamynda ykdysady, energetika, medeni-ynsanperwer we durmuş ulgamlarynda birnäçe başlangyçlaryň ara alnyp maslahatlaşylandygyny, şeýle hem hyzmatdaşlygyň täze mümkinçilikleriniň kesgitlenendigini aýtdy:

«Awgust aýynda Azerbaýjan Respublikasynyň Prezidenti Ilham Aliýew Türkmenistandaky Awaza şäherine amala aşyran saparynyň çäginde Türkmenistanyň we Özbegistanyň döwlet Baştutanlarynyň gatnaşmagynda geçirilen ýokary derejeli üçtaraplaýyn duşuşyga gatnaşdy. Bu duşuşyk sebitde hyzmatdaşlygy giňeltmek we ulag hem-de üstaşyr daşamalary ulgamlarynda özara bähbitli hyzmatdaşlyk boýunça birnäçe möhüm resminamalaryň gol çekilmegi üçin möhüm mümkinçilik döretdi».

G. Gözalow oktýabr aýynda Gabala şäherinde geçirilen Türki Döwletler Guramasynyň 12-nji sammitiniň çägindäki çäreleriň iki ýurduň liderleriniň arasyndaky gatnaşyklary has-da berkidendigini nygtady. Prezident Ilham Aliýew bilen Gurbanguly Berdimuhamedowyň duşuşygynda ikitaraplaýyn gatnaşyklaryň pugtalandyrylmagy, geljekki hyzmatdaşlygyň ugurlary we sebit başlangyçlary giňişleýin ara alnyp maslahatlaşyldy.

«Gabala şäherinde geçirilen sammitiň dowamynda Gurbanguly Berdimuhamedowyň başlangyjy bilen Türkmenistanyň Arkadag şäheriniň doganlaşan şäheri bolan Azerbaýjanyň Fizuli şäherinde gurlup başlanan metjidiň düýbüniň tutulmagy medeni we ynsanperwer hyzmatdaşlygyň strategik ähmiýetini has-da artdyrdy. 2025-nji ýylyň noýabr aýynda Daşkent şäherinde geçirilen sammitde Azerbaýjanyň Merkezi Aziýa döwlet Baştutanlarynyň Konsultatiw formatyna doly hukukly agza hökmünde kabul edilmegi sebitdäki hyzmatdaşlyk arhitekturasyna täze bir element goşdy.

Türkmen halkynyň Milli Lideri Gurbanguly Berdimuhamedowyň Azerbaýjan döwletiniň Baştutanyny 2026-njy ýylda Türkmenistanda geçiriljek nobatdaky sammite gatnaşmaga çagyrmagy Türkmenistanyň ýurdumyza goldawyny aýdyň görkezýär», — diýip, ilçi nygtady.