Biz ýakynlaşmagy ugur edinýäris

25-nji iýundan 3-nji iýula çenli ÝUNESKO-nyň Pariždäki ştab-kwartirasynda ÝUNESKO-nyň Hökümetara okeanografiýa toparynyň 33-nji sessiýasy geçirilýär. Bu bolsa ummanlary öwrenmäge we olary gorap saklamaga bagyşlanan esasy halkara çäreleriň biri bolup durýar.Çäräniň öňüsyrasynda, ýagny 24-nji iýunda HOT-yň Ýerine ýetiriji komitetiniň 58-nji sessiýasy hem geçirildi.

Sessiýanyň çäklerinde ummanlaryň monitoringi, howanyň üýtgemeginiň netijelerini çaklamak we deňiz gurşawyny goramak babatda halkara hyzmatdaşlygy pugtalandyrmaga gönükdirilen ylmy maslahatlaşmalar we tematiki duşuşyklar geçirilýär.

Çäräniň işine Türkmenisatnyň wekiliýeti hem gatnaşýar. Onuň düzümine Hazar deňzi institutynyň direktory Myrat Atajanow, ÝUNESKO-nyň ýanyndaky Türkmenistanyň Hemişelik wekili, Adatdan daşary we Doly ygtyýarly ilçisi Maksat Çaryýew, şeýle hem Türkmenistanyň DIM-niň şertnama-hukuk bölüminiň wekili Kemal Garaýew girýär.

Türkmenistan deňiz ekoulgamlaryny goramak, okeanografiýa babatda ylmy barlaglary ösdürmek we hyzmatdaşlygy pugtalandyrmak boýunça halkara başlangyçlaryna bolan ygrarlylygyny tassyklaýar. Biologik köpdürliligi gorap saklamak we deňiz serişdelerini, şol sanda Hazar deňzini sebitiň özboluşly tebigy ýeri hökmünde durnukly ulanmak, ýaly işlere aýratyn üns berilýär.

HOT-yň alyp barýan işine işjeň gatnaşmak Türkmenistana ylmy-tehniki binýadyny berkitmäge, halkara ylmy dialogyny çuňlaşdyrmaga hem-de ummanlary we deňizleri goramak bilen baglanyşykly Durnukly ösüş maksatlaryna ýetmekde öz goşandyny goşmaga mümkinçilik berýär.

Hökümetara okeanografiýa topary (HOT) bu 1960-njy ýylda döredilen BMG-niň ýöriteleşdirilen edarasy bolup, ummanlar bilen baglanyşykly ylmy barlaglary alyp barmak, irki duýduryş ulgamyny işläp taýýarlamak hem-de deňiz serişdelerini durnukly ulanmak boýunça halkara tagallalary utgaşdyrýar.

ORIENT

Foto: Türkmenistanyň Fransiýadaky Ilçihanasynyň Sosial Mediýasy