Biziň yhlasymyz – adamlary ýakynlaşdyrmak
Habarlar
Makalalar
Media
Anons
Tehnologiýalar
Biz barada
Habarlaşmak üçin
||
2025-nji ýylyň 3-nji dekabrynda Türkmenistanyň bilim ministri Jumamyrat Gurbangeldiýewiň we Pakistan Yslam Respublikasynyň Türkmenistandaky Adatdan daşary we Doly ygtyýarly ilçisi Farýal Legariniň arasynda netijeli duşuşyk geçirildi.
Dostlukly ýagdaýda geçen duşuşykda iki ýurduň ýokary okuw mekdepleriniň arasynda hyzmatdaşlygy berkitmek meselelerine aýratyn üns berildi. Taraplar hereket edýän hem-de täze ikitaraplaýyn şertnamalaryň netijeli ýerine ýetirilmeginiň zerurdygyny bellediler.
Ministr Jumamyrat Gurbangeldiýew Hanym Ilçä Türkmenistanda bilimiň hilini ýokarlandyrmak babatda alnyp barylýan işler barada gürrüň berdi we türkmen ýokary okuw mekdepleriniň guramagynda geçirilýän halkara maslahatlara hem-de olimpiadalara pakistanly ýaşlaryň üstünlikli gatnaşýandygyny aýtdy.
Pakistanyň ilçisi ýurdumyzda geçirilýän özgertmelere ýokary baha berdi we hyzmatdaşlygy mundan beýläk-de giňeltmäge uly gyzyklanma bildirdi. Hususan-da, birnäçe anyk mümkinçilikler maslahatlaşyldy:
• Türkmen ýaşlarynyň Pakistanyň ýokary okuw mekdeplerinde talyp haklary esasynda okamagy.
• Talyp alyş-çalşygy boýunça maksatnamalaryň ýerine ýetirilmegi.
• Iki ýurduň bilim edaralarynyň wekiliýetleriniň özara tanyşdyryş saparlarynyň guralmagy.
Duşuşygyň ahyrynda taraplar hyzmatdaşlygy mundan beýläk-de hem işjeň ösdürmäge we täze bilelikdäki bilim taslamalaryny durmuşa geçirmäge ygrarlydyklaryny tassykladylar.
ORIENT
